Украина учувчисиз аппаратларининг Кремлга ҳужумидан сўнг, Украина президенти Володимир Зеленскийни ўлдиришдан бошқа чора қолмаган. Бу ҳақда Россия Хавфсизлик кенгаши раиси ўринбосари Дмитрий Медведев ўзининг “Telegram”даги каналида маълум қилди.

Сиёсатчининг сўзларига кўра, Зеленский ҳатто Украинанинг таслим бўлиши ҳақидаги актга имзо чекиши ҳам шарт эмас.

“Биласизми, Гитлер ҳам таслим бўлиш актини имзоламаган. Ҳар доим, ҳар доим ўринбосар топилади”, – деди Медведев.

Қайд этиш мумкин, Украина 3 майга ўтар кечаси Россия президентининг қароргоҳига дронлар билан зарба беришга урингани ҳақида хабар берилди. Иккита дрон Кремлни нишонга олишга қаратилгани, ҳарбийлар ва махсус хизматларнинг ўз вақтида кўрган ҳаракатлари натижасида қурилмалар ишдан чиқарилгани иддао қилинган.

Зеленскийнинг сўзларига кўра, Украина ўз ҳудудида жанг олиб бормоқда ва ҳудудини Россиядан ҳимоя қилмоқда.

“Биз Путинга ёки Москвага ҳам ҳужум қилмаймиз. Ўз заминимизда жанг қиламиз, қишлоқ ва шаҳарларимизни муҳофаза қиламиз. Бунинг учун ҳам қуролимиз етарли эмас. Шунинг учун қуроллардан бошқа мақсадларда фойдаланмаймиз”, – дейди Украина президенти.

• Дмитрий Медведев
• Украина
• Зеленский