Yer shari aholisi 28-martda bir vaqtning o‘zida Quyosh tizimining beshta sayyorasi: Yupiter, Merkuriy, Venera, Uran va Marsning bir safga tizilishini kuzatishi mumkin.

Buyuk Britaniyaning Edinburg universiteti xodimi Bet Billerning so‘zlariga ko‘ra, beshta sayyoraning bir safga tizilishi kamdan-kam uchraydigan hodisa. Sayyoralarning bunday paradini 2022, 2020 va 2016-yillarda kuzatish mumkin bo‘lgan. 2022-yil Yerning shimoliy yarim shari aholisi Merkuriy, Venera, Mars, Yupiter va Saturnning bir chiziqda saf tortganini kuzatgan.

Billerning so‘zlariga ko‘ra, osmonda Venera va Yupiterni ko‘rish osonroq bo‘ladi. So‘nggi bir necha hafta ichida bu ikki sayyora allaqachon bir-biriga yaqin masofada kuzatilgan. Mars unchalik yorqin bo‘lmasa-da, uni kuzatish mumkin. Biroq Merkuriy osmon tiniq bo‘lsagina ko‘rinadi, Uranni esa durbin yoki teleskopsiz kuzatish qiyin bo‘ladi.

2023-yil davomida yana bir nechta sayyoralar paradi kuzatilishi kutilmoqda. Xabarlarga ko‘ra, aprel oyida Merkuriy, Uran, Venera va Marsni xam bir safda ko‘rish mumkin.

Ma’lumot uchun, sayyoralar paradi bu astronomik hodisa bo‘lib, unda Quyosh tizimidagi ma’lum sayyoralar Quyoshdan 20-30 gradusgacha tarqalish bilan “bir xil to‘g‘ri chiziqda” joylashgan. Bundan tashqari, ular samoviy sferada bir-biriga nisbatan yaqin masofaga keladi.

“Sayyoralar paradi” tushunchasi ilmiy emas va astronomiyada faqat uni ommalashtirish uchun qo‘llaniladi.

Ekliptik uzunlikdagi samoviy jismlarning maksimal yaqinlashuvi konyunksiya deyiladi. Agar ular bir vaqtning o‘zida yetarlicha yaqin va ekliptik kenglikda bo‘lsa, bu konfigurasiyada uzoqroq obyektni yaqinroq jism bilan qoplash mumkin, ya’ni tutilish xodisasi.