34°
Kechasi 20°
Jizzax viloyatining Forish tumanida quvvati 500 MVt bo‘lgan quyosh fotoelektr stansiyasi hamda havo elektr uzatish tarmog‘i quriladi. Bu haqda prezident qarori imzolangan.
Hujjatga ko‘ra, aholi va iqtisodiyot tarmoqlarini energiya resurslari bilan barqaror ta’minlash, elektr energiyasi ishlab chiqarishda tabiiy gazdan foydalanishni kamaytirish hamda qayta tiklanuvchi energiya manbalaridan foydalanish ko‘lamini kengaytirish maqsad qilingan.
Loyihani amalga oshirish uchun Xitoyning China Electrical Equepment International Co. LTD hamda China Huadison Overseas Co. LTD kompaniyalari tomonidan Huardian Jizzakh Solar Power MChJ (loyiha kompaniyasi) ta’sis etilgan.
Investorlar va loyiha kompaniyasi Jizzax viloyatida 2,08 milliard Xitoy yuani miqdorida to‘g‘ridan to‘g‘ri investitsiya jalb etgan holda quvvati 500 MVt bo‘lgan quyosh fotoelektr stansiyasini loyihalashtirishi, moliyalashtirishi, qurishi hamda ekspluatatsiya qilishi lozim. “O‘zenergosotish” AJ 25 yil davomida elektr energiyasini kafolatlangan tarzda xarid qiladi.
Loyihani amalga oshirish uchun Jizzax viloyatining Forish tumanidan jami 991,1 gektar yaylov yer uchastkasi ajratiladi va qishloq xo‘jaligiga mo‘ljallangan yerlar toifasidan sanoat, transport, aloqa, mudofaa va boshqa maqsadlarga mo‘ljallangan yerlar toifasiga o‘tkaziladi.
2025-yilning aprelida birinchi Samarqand xalqaro iqlim forumi doirasida Investitsiyalar, sanoat va savdo vazirligi tomonidan O‘zbekistonda “yashil iqtisodiyot”ni rivojlantirishga qaratilgan qator hujjatlar imzolangandi. Jumladan, Xitoyning Liquip International kompaniyasi Jizzax viloyatining Forish tumanida 500 MVt quvvatga ega quyosh elektr stansiyasini qurish bo‘yicha investitsiya bitimi qabul qilingandi.
Shavkat Mirziyoyev 2024-yilning fevralida bo‘lib o‘tgan yig‘ilishda energetika vaziri va viloyatlar hokimlarining muqobil energetika sohasidagi rejalaridan norozi bo‘lib, ikki-uch oy ichida 14 ta quyosh va shamol elektr stansiyalarini ishga tushirish, shuningdek, ikkita nasosli saqlash stansiyasi loyihalarini boshlashga topshiriq bergan edi. Prezident “yashil energetika ham iqtisodiyotimiz drayverlaridan biriga, ham chinakam umummilliy harakatga aylandi”, – deb aytgandi.
O‘zbekistonda aholining energiya manbalariga talabini qondirish maqsadida har yili ko‘plab loyihalar amalga oshirilmoqda. Bu ishlar natijasida oxirgi 5 yilda elektr energiyasi ishlab chiqarish 30 foiz ko‘payib, 81,5 milliard kilovatt soatga yetdi. 2025-yilda quvvati 65 mVt bo‘lgan 1 185 ta mikroges barpo etilishi rejalashtirilgan.
O‘zbekiston va jahonda ro‘y berayotgan eng so‘nggi voqea-hodisalar, sport, shou-biznes, madaniyat, informatsion texnologiyalar va ilm-fan yangiliklaridan doimo xabardor bo‘ling!
O‘zbekiston va jahonda ro‘y berayotgan eng so‘nggi voqea-hodisalar, sport, shou-biznes, madaniyat, informatsion texnologiyalar va ilm-fan yangiliklaridan doimo xabardor bo‘ling!
