Prezidentning “Pedagog kadrlar tayyorlash tizimini yanada takomillashtirish chora-tadbirlari to‘g‘risida”gi farmonida Maktabgacha va maktab taʼlimi vazirligiga bu bo‘yicha 2025-yil yakuniga qadar Vazirlar Mahkamasiga taklif kiritish vazifasi belgilangan.

Farmonga ko‘ra, maqsadli magistraturani 2026-2027-o‘quv yilidan boshlab to‘lov-kontrakt asosida tashkil etish ko‘zda tutilgan. Oliy malaka toifasiga ega o‘qituvchilarning ishdan ajralmagan holda bilim olishlari uchun ta’lim jarayoni masofaviy ta’lim shaklida tashkil etiladi.

Magistraturaga faqat xalqaro tashkilot tomonidan akkreditatsiyadan o‘tkazilgan tizimda oliy malaka toifasiga ega bo‘lgan o‘qituvchilar qabul qilinadi.

Magistraturada masofadan o‘qish va davlat namunasidagi diplom berish tartibi, to‘lov-kontrakt miqdorini belgilash hamda talabalar bilimini baholash mezonlari ishlab chiqiladi.

Prezidentning ushbu farmoni bilan Nizomiy nomidagi Toshkent davlat pedagogika universiteti negizida Nizomiy nomidagi O‘zbekiston milliy pedagogika universiteti tashkil etiladi. 2025-2026-o‘quv yilidan boshlab bosqichma-bosqich universitetning boshqaruv tizimi “Yangi O‘zbekiston” universiteti tajribasi asosida tubdan takomillashtiriladi. Universitetning mavjud 14 ta fakulteti maqbullashtirilib, 6 ta pedagogika oliy maktablari tashkil etiladi. Universitetning bakalavriat taʼlim yo‘nalishlariga birinchi kursdan xalqaro taʼlim dasturlari joriy etiladi.

• Magistratura
• Pedagog
• Prezident
• Qaror