Xitoy shanba kuni mamlakat janubi-g‘arbidagi Tibet avtonom tumanida, Yarlung-Sangpo daryosi quyi oqimida umumiy sarmoyasi qariyb 1,2 trillion yuan (taxminan 167,2 milliard dollar) bo‘lgan gidroelektrostansiya qurilishini rasman boshladi, deyilgan Xitoy Xalq Respublikasi Davlat kengashi saytida berilgan bayonotda.

Loyiha besh kaskadli GESdan iborat. Ishlab chiqarilgan quvvat birinchi navbatda tashqi iste’mol, shuningdek Tibetning o‘zida mahalliy talabni qondirish uchun yetkazib beriladi.

Hozir yer yuzidagi eng ulkan GES ushbu mamlakat markaziy qismidagi Xubey provinsiyasida, Yanszi daryosida joylashgan “Sansya” (Uch dara) majmuasi hisoblanadi. 2008-yil oktyabrda ishga tushgan “Sansya” 22,4 million kilovatt quvvatga ega.

Mahalliy matbuot avvalroq Tibetda bunyod qilinishi rejalashtirilayotgan yangi GESning quvvati 60 million kilovattni tashkil etishi, ishlab chiqariladigan yillik quvvat 300 milliard kilovatt-soatga yetishini yozgandi. Demak, yangi inshoot “Sansya” GESidan qariyb uch barobar yuqori quvvatga ega bo‘ladi.

Mazkur ulkan loyiha Hindiston rasmiylarini xavotirga solmoqda. Yanvar oyi boshida ushbu davlat tashqi ishlar vazirligi rasmiy vakili Randxir Jaysval mazkur bunyodkorlik tashabbusi jarayoni diqqat bilan kuzatib borilayotgani aytib, Pekinni bunday inshoot qurishda Dehli va boshqa mintaqalar manfaatini buzmaslikka chaqirgan.

Uzunligi 1 700 metrga cho‘zilgan Yarlung-Sangpo daryosi Tibet janubi-g‘arbidagi Kaylash tog‘i yaqinidagi Jima Yangzong muzligidan boshlanib, Hindistondagi Sing daryosiga, so‘ngra Braxmaputraga quyiladi, shundan so‘ng Bangladeshga yetib boradi.

• GES
• Matbuot
• Tibet
• Xitoy