Toshkent viloyati Ekologiya, atrof-muhitni muhofaza qilish va iqlim o‘zgarishi boshqarmasi hamda viloyat Ichki Ishlar boshqarmasi xodimlari bilan hamkorlikda Bekobod tumanida reyd tadbirlari o‘tkazildi.

Reyd davomida fuqarolar F.T. va U.Q. tomonidan Bekobod tumani “Achamayli” MFY hududidan oqib o‘tuvchi Sirdaryo daryosi o‘zanidan davlat raqami “20 Q 923 DA” bo‘lgan yuk avtomobili hamda maxsus yuklovchi transport vositasi yordamida noqonuniy ravishda qum-shag‘al aralashmasi ortib olib chiqib ketilayotganligi aniqlangan. Bu haqda O‘zbekiston Respublikasi Ekologiya, atrof-muhitni muhofaza qilish va iqlim o‘zgarishi vazirligi axborot xizmati xabar berdi.

Bu bilan O‘zbekiston Respublikasi Vazirlar Mahkamasining 2022-yil 23-noyabrdagi 666-sonli qarori 1-ilovasi bilan tasdiqlangan “Noruda materiallarni noqonuniy qazib olishda tabiiy obyektlarga yetkazilgan zararni hisoblash tartibi to‘g‘risida”gi nizomning tegishli bandiga asosan hisoblanganda tabiatga 16 milliard 912 million 862 ming 600 yuz so‘m zarar yetkazilgan.

Holatga huquqiy baho berish maqsadida to‘plangan hujjatlar Toshkent viloyati Prokuraturasiga yuborilgan.

• Toshkent viloyati
• tabiat