Germaniya kansleri Fridrix Mers Vladimir Putinning imperiyaviy ambitsiyalari faqat Ukraina bilan cheklanib qolmasligini bildirdi. Uning ta’kidlashicha, bu hali faqatgina boshlanishi. Kansler Yevropa ittifoqdoshlarini ustuvor yo‘nalishlarni qayta ko‘rib chiqish va AQSh bilan munosabatlar o‘zgarayotgan sharoitda yangi hamkorlar izlashga chaqirdi.

Mersning so‘zlariga ko‘ra, Amerika hamon muhim ittifoqchi bo‘lib qolmoqda, ammo Vashington endi hamkorlikni o‘z manfaatlari va shartlari bilan bog‘lamoqda. “Biz Yevropada o‘z manfaatlarimizni qayta ko‘rib chiqishimiz kerak — hech qanday yolg‘on nostalgiyasiz”, — deya ta’kidladi kansler.

Yevropa komissiyasi prezidenti Ursula fon der Lyayen ham Mers fikrini qo‘llab-quvvatlab, Putinni “yirtqich” deb atadi va uni “Ukraina bilan to‘xtamaydi”, deb ogohlantirdi. Uning ta’kidlashicha, Rossiya kiberhujumlar, migratsiya bosimi orqali Yevropa jamiyatlarini yillar davomida zaiflashtirmoqda.

Bu xavotirlar Yevropada aniq amaliyotlarda ham o‘z aksini topmoqda. Le Figaro nashri ma’lumotlariga ko‘ra, Fransiya hukumati mamlakat bo‘ylab shifoxonalarga 2026-yil martgacha “katta to‘qnashuv” ssenariysiga tayyorgarlik ko‘rishni buyurgan. Regional agentliklarga yaralangan harbiylarni — fransuz va ittifoqchi davlatlarning ommaviy qabul qilish yuzasidan ko‘rsatmalar berilgan.

Shu bilan birga, NATO bosh kotibi Mark Ryutte Rossiya besh yil ichida alyansga hujum qilishga tayyor bo‘lishi mumkinligini aytgan. Daniya razvedkasi esa 2–3 yil ichida NATOga a’zolardan bir nechtasiga tahdid yuzaga kelishi, hatto 6 oy ichida mahalliy nizo ehtimoli haqida ogohlantirgan.

• Germaniya
• Prezident
• Putin