Toshkent shahrida pulli to‘xtash joylari tashkil etilgan ko‘chalardagi ko‘p qavatli uylarda istiqomat qiluvchi aholi uchun maxsus imtiyozlar yaratiladi. Bu haqda poytaxt hokimligining Matbuot xizmati xabar berdi.

Xabarga ko‘ra, imtiyozlar doirasida poytaxt aholisi uchun rezidentlik ruxsatnomalari joriy etilib, ruxsatnoma egalari o‘z mahallasi hududidagi to‘xtash joylaridan sutkaning kechki paytidan tonggacha imtiyozli shartlarda foydalanish imkoniga ega bo‘ladi. Shuningdek, kunduzgi vaqtda ham muayyan chegirmalar beriladi, bayram va dam olish kunlarida esa yanada kengroq imtiyozlar taqdim etiladi.

Hozirgi kunda rezidentlik ruxsatnomalarini elektron tartibda olish uchun Yagona interaktiv davlat xizmatlari portali bilan integratsiya ishlari olib borilmoqda. Jarayonlar joriy yilning noyabr oyiga qadar yakunlanishi rejalashtirilgan.

Ushbu ishlar yakunlanganidan so‘ng, Toshkent shahar hokimining tegishli qarori qabul qilinib, ruxsatnoma berish tartibi, amal qilish muddati, huquqqa ega bo‘luvchi fuqarolar toifasi, taqdim etiladigan imtiyozlar ro‘yxati aniq belgilanadi.

“Qaror qabul qilingan vaqtda hamshaharlar tanishib chiqishlari uchun belgilangan tartibda e’lon qilinadi”, – deyiladi hokimlik xabarida.

Ma’lumot uchun, avvalroq poytaxt hokimining tegishli qarori qabul qilinib, shaharda pulli “parkovka” narxlari tasdiqlangan edi. Qarorga muvofiq, 5 ta tarif zonasi mavjud va ularning narxi zonadagi “parkovka”ga bo‘lgan talabga qarab o‘zgaradi. Xususan, birinchi zona shahar markazini va to‘xtash joylariga bo‘lgan ehtiyoj yuqori bo‘lgan eng tirband hududlarni qamrab oladi va ulardan foydalanish soatiga 12 000 so‘mni tashkil etadi. Aksincha, beshinchi zona – eng chekka va kam gavjum hududlar uchun narx 5 000 so‘m etib belgilangan.

• Avtoturargoh
• Hokimlik
• Imtiyoz
• Toshkent
• xabar