O‘zbekiston 2021-yilning avgustida Afg‘onistonda amaldagi hokimiyat qulaganida mamlakatdan olib chiqib ketilgan harbiy vertolyotlarni mamlakatni hozirda idora qilayotgan “Tolibon” muvaqqat hukumatiga qaytarishga rozi bo‘lgani haqida xabarlar tarqalgandi. O‘zbekiston Tashqi ishlar vazirligi matbuot kotibi Ahror Burhonov bunday xabarlarni rad etdi.

Uning aytishicha, bu xabarlar haqiqatga to‘g‘ri kelmaydi. 

AQSH Mudofaa vazirligi 2021-yilda “Tolibon” Afg‘onistonda hokimiyatni egallaganidan so‘ng 46 ta samolyot va vertolyotning O‘zbekistonga, yana 18 tasining Tojikistonga olib borilganini tasdiqlagan. Bu parvoz vositalari tarkibiga Mi-17 va UH-60 vertolyotlari, shuningdek, PC-12, C-208, AC-208 va A-29 rusumli qanotli samolyotlar kirgan.

“Tolibon” bir necha bor ikkala davlatdan ham ularni topshirishni talab qilgan, biroq Toshkent va Dushanbedagi rasmiylar bu talablar yuzasidan ochiq izoh bermagan.

8-sentyabr kuni “Afghanistan International” nashri o‘z manbalariga tayanib, “yaqin kunlarda O‘zbekiston Afg‘onistonga 2021-yilda avvalgi rejim qulashi paytida mamlakatdan olib chiqilgan 57 ta harbiy vertolyotini qaytarishi mumkinligi” haqida xabar berdi.

11-sentyabr kuni esa “The Kabul Times” nashri ham Afg‘oniston muvaqqat hukumati rasmiy vakili Zahirulloh Mujohidga tayanib, O‘zbekiston Afg‘onistonga 57 ta harbiy vertolyotni qaytarishga rozi bo‘lgani haqida xabar tarqatdi.

Mujohid “bu Afg‘oniston havo kuchlarini qayta qurish, shuningdek, ikki qo‘shni davlat o‘rtasidagi aloqalarni mustahkamlashda muhim qadam bo‘lishi” haqida gapirgan.

• Afg‘oniston
• Hukumat
• Toliblar
• Tolibon