Yevropa komissiyasi raisi Ursula fon der Lyayen Isroil bo‘yicha bir qator bayonotlar berdi. Bu haqda Euronews xabar berdi.

U Yevroparlament deputatlari oldida Isroil bilan tuzilgan bitimni qisman to‘xtatib turishni taklif qildi.

“Isroilga ko‘rsatilayotgan ikki tomonlama yordamni Isroil fuqarolik jamiyati bilan aloqalarga ta’sir qilmagan holda to‘xtatamiz, bu yo‘nalishlardagi barcha to‘lovlarni bekor qilamiz”, – degan u.

​Shuningdek, siyosatchi “Isroilning ekstremist vazirlari va zo‘ravonlikka qo‘l uruvchi manzilgohlar aholisi”ga, ya’ni yahudiy ko‘chmanchilariga qarshi sanksiyalar joriy etishni ilgari surgan.

“Bundan tashqari, savdo masalalari bo‘yicha assotsiatsiya bitimining amal qilishini qisman to‘xtatib turishni ham taklif etamiz”, – degan u.

Yevrokomissiya oktyabr oyida Falastin donorlar guruhini tuzishi kutilmoqda.

“Kelgusi oyda biz G‘azoni tiklash uchun maxsus vositani o‘z ichiga olgan Falastin donorlar guruhini shakllantiramiz. Bu mintaqaviy hamkorlar bilan birgalikda amalga oshiriladigan xalqaro tashabbus bo‘ladi”, – deya ta’kidlagan Lyayen.

• Isroil
• Yevrokomissiya