Wolt yetkazib berish xizmati 1,5-yillik faoliyatdan so‘ng O‘zbekiston bozorini tark etadi. Bu haqda kompaniya mobil ilova va sayt orqali ma’lum qildi. Kompaniya ushbu qarorni “O‘zbekiston bozorining o‘ziga xosligi va o‘zining standartlariga mos servis darajasini barqaror ta’minlay olmasligi” bilan izohladi.

Kompaniyaning qayd etishicha, ushbu qarorga kelish oson bo‘lmagan. Strategiya global miqyosda investitsiyalarni uzoq muddatli va barqaror biznes qurish mumkin bo‘lgan yo‘nalishlarga qaratish maqsadida qayta ko‘rib chiqilgan.

“O‘zbekistondagi bozor sharoitlarining o‘ziga xosligi sababli, biz o‘z standartlarimizga mos keladigan servis darajasini barqaror ushlab tura olmasligimiz haqidagi xulosaga keldik. Biz O‘zbekistonda yarata olgan servisimizdan faxrlanamiz va uning bir qismi bo‘lgan barchaga, ayniqsa, mijozlarimizga minnatdorchilik bildiramiz”, – deyiladi xabarda.

4-martgacha servis odatdagi tartibda ishlaydi. Unda buyurtma berish va mavjud bonuslardan foydalanish mumkin. 5-martdan boshlab yangi buyurtmalarni qabul qilish to‘xtatiladi.

• Bozor
• O‘zbekiston
• Strategiya
• kompaniya