Ozarbayjonning bir qator hududlarida yuqori sinf o‘quvchilari o‘rtasida ommaviy tekshiruvlar o‘tkazilmoqda. Bu haqda “Minval Politika” xabar berdi.

Tekshiruvlar asosan Absheron tumani, Sumgait hamda yaqin hududlardagi maktablarni qamrab olgan. Ma’lum qilinishicha, voyaga yetmaganlar ishlari bo‘yicha inspektorlar dars vaqtida sinfxonalarga kirib, o‘quvchilarni tekshirmoqda. Taqiqlangan buyum aniqlansa, o‘quvchi alohida suhbatga olib chiqiladi va bu haqda maktab rahbariyati hamda ota-onalarga darhol xabar beriladi.

Huquq-tartibot organlari xodimlari o‘quvchilarning sumkalari va shaxsiy buyumlarini ko‘zdan kechirmoqda. Tekshiruvlar asosan tig‘li buyumlar, tamaki mahsulotlari va boshqa xavfli vositalarni aniqlashga qaratilgan.

So‘nggi paytlarda maktablarda sodir bo‘layotgan hodisalar ko‘paygani sabab o‘qituvchilar ota-onalarga farzandlarining sumkalarini tekshirib turishni tavsiya qilmoqda.

Xususan, joriy yil fevral oyida Boku shahrida 10-sinf o‘quvchisi otasiga tegishli ov quroli bilan o‘qituvchini yaralagani qayd etilgan. Shuningdek, boshqa maktablarda ham o‘quvchilar o‘rtasida zo‘ravonlik bilan bog‘liq bir nechta holatlar kuzatilgan.