Yevrokomissiya Tojikistonning uchta banki — «Spitamen Bank», «Dushanbe Siti Bank» va «Kommersbank Tadjikistana»ni sanksiyalar ro‘yxatidan chiqardi.

Tojikiston Milliy banki ma’lum qilishicha, bu qaror Yevropa hamkorlari bilan olib borilgan muzokaralar natijasida qabul qilingan. Regulyator bu qadam mamlakat bank tizimi rivojiga ijobiy ta’sir ko‘rsatishini ta’kidlagan.

Avvalroq ushbu banklar Yevropa Ittifoqining Rossiyaga qarshi 19-sanksiyalar paketi doirasida “qora ro‘yxat”ga kiritilgan edi. Ular Rossiya bilan moliyaviy operatsiyalar orqali sanksiyalarni chetlab o‘tishga ko‘maklashganlikda gumon qilingan.

Shu bilan birga, 23-aprel kuni Yevroittifoq Rossiyaga qarshi 20-sanksiyalar paketini ham tasdiqladi. Unda portlar, tankerlar, kriptovalyuta platformalari hamda Rossiya harbiy-sanoat kompleksi bilan bog‘liq kompaniya va shaxslarga nisbatan cheklovlar kiritilgan.

E’tiborlisi, yangi sanksiyalar doirasida O‘zbekistonda faoliyat yurituvchi «Raw Materials Cellulose» va «Farg‘ona kimyo zavodi» korxonalariga nisbatan ham cheklovlar joriy etilgan. Qarorda ularning Rossiya harbiy-sanoat kompleksi bilan ehtimoliy aloqalari qayd etilgan.