Toshkent viloyatida zararli dasturlarni sotish bilan shug‘ullangan shaxs faoliyatiga chek qo‘yildi. Davlat xavfsizlik xizmati, Toshkent shahar IIBB hamda “Kiberxavfsizlik markazi” mutaxassislari hamkorligida o‘tkazilgan tezkor tadbir davomida u qo‘lga olindi.

Ma’lum bo‘lishicha, Chirchiq shahrida yashovchi 2005-yilda tug‘ilgan fuqaro o‘zi yaratgan zararli “APK” dasturlarni Telegram orqali 100–300 ming so‘m evaziga kamida 10 nafar foydalanuvchiga sotgan. U xaridorlarga texnik yordam ko‘rsatib, dasturlardan foydalanish bo‘yicha maslahatlar ham berib kelgan.

Aniqlanishicha, ushbu dasturlar orqali boshqalarning Telegram akkauntlariga noqonuniy kirish, telefonlardagi SMS-xabarlarni o‘qish hamda to‘lov tizimlaridagi mablag‘larni o‘zlashtirish mumkin bo‘lgan.

Shuningdek, gumonlanuvchi Telegram’dagi 5 dan ortiq guruh va kanallarga administratorlik qilib, ularda zararli dasturlarni targ‘ib qilgan.

Tezkor tadbir davomida undan “Asus ExpertBook” noutbuki, “Redmi Note 10 Pro” telefoni, qattiq disk hamda bank kartalari ashyoviy dalil sifatida musodara qilindi.

Hozirda mazkur holat yuzasidan jinoyat ishi qo‘zg‘atilib, tergov harakatlari olib borilmoqda.