Joriy yil 3-iyundan 4-iyunga o‘tar kechasi mahalliy vaqt bilan soat 02:00 da Uzbekistan Airways milliy aviakompaniyasining bortida 240 nafar ziyoratchi bo‘lgan ilk reysi Toshkentdan Madinaga (Saudiya Arabistoni) uchib ketdi. Shu tariqa, 2023-yilgi Haj mavsumi ochildi.

Qayd etilishicha, 4-19-iyun kunlari O‘zbekistonning 10 ta shahridan Madinaga parvozlar amalga oshiriladi. Bu yil eng ko‘p ziyoratchilar Toshkentdan Hajga boradi – 16 reysda 5 575 nafar yo‘lovchi tashiladi. Namangandan 14 ta, Farg‘onadan 6 ta, Samarqanddan 4 ta, Buxoro, Urganch, Qarshi va Termizdan 3 tadan reys, shuningdek, 2 ta reys Navoiydan, Nukusdan esa 1 ta reys amalga oshiriladi. 2023-yilda Oʻzbekistondan jami 15 130 nafar ziyoratchi Haj ziyoratini ado etadi.

Bu yilgi Haj boshlanishi bilan Toshkent xalqaro aeroporti jo‘nab ketish zalining steril zonasida bir vaqtning o‘zida 80 va 60 kishini sig‘dira oladigan ikkita, erkaklar va ayollar uchun namozxona ochildi. Bundan tashqari, ibodatxonalar oldida endi tahorat olish uchun – erkaklar va ayollar uchun ham maxsus xonalar mavjud. Shu bilan birga, hojatxonalarning katta bloki foydalanishga topshirilgan.

Eslatib oʻtish mumkin, mazkur reyslar davomida poytaxt aeroporti estakadasida harakatlanish vaqtincha cheklanadi, terminalga kirish faqat yoʻlovchilar uchun ochiq boʻladi. Shuningdek, O‘zbekiston musulmonlari idorasi ziyoratchilarning yaqinlariga terminalda tiqilinch holatni va aeroport yon atrofida tirbandliklarni oldini olish uchun aeroportga kelmasdan, o'z yaqinlarini masjidlardan kuzatishni tavsiya qildi. Ziyoratchilar aeroportga maxsus avtobuslarda uyushqoqlik bilan yetib kelishadi, roʻyxatdan oʻtgach yetarlicha oʻrindiqlar joylashgan joʻnab ketish zonasiga borishadi, samolyotga chiqishni kutish vaqtida ziyoratchilarga ichimlik va gazaklar ham taklif etiladi.

• Haj
• O‘zbekiston
• O‘zbekiston musulmonlari idorasi
• Saudiya Arabistoni