AQShning Rod-Aylend shtati Providens shahridagi Braun universitetida sodir bo‘lgan otishma oqibatida o‘zbekistonlik talaba Muhammadaziz Umurzoqov ham vafot etdi. Bu haqda dastlab GoFundMe bergan xabarni O‘zbekiston TIV matbuot kotibi ham tasdiqladi.

“U nihoyatda mehribon, xushchaqchaq va aqlli edi. Neyroxirurg bo‘lish va odamlarga yordam berish katta orzusi edi. U har jihatdan oilamning eng yorqin namunasi bo‘lib qolmoqda. U har doim ehtiyoji bo‘lgan har bir kishiga hech ikkilanmasdan yordam qo‘lini cho‘zardi va oilamizdagi eng oqko‘ngil inson edi. Oilamiz bu yo‘qotishdan chuqur iztirobda. Har qanday xayriya oilam duch keladigan har qanday xarajatga sezilarli darajada yordam beradi va qolgan mablag‘lar uning nomiga xayriya qilinadi”, — deya GoFundMe’da xabar qoldirgan Samira Umurzokova.

Ma’lumot uchun, GoFundMe — odamlarga bayramlar va bitirish marosimlari kabi hayotiy voqealardan tortib, baxtsiz hodisalar va kasalliklar kabi qiyin vaziyatlargacha bo‘lgan turli xil tadbirlar uchun mablag‘ yig‘ish imkonini beruvchi Amerika kraudfanding platformasidir.

Muhammadaziz Umurzoqovning halok bo‘lgani munosabati bilan marhumning oila a’zolari va yaqinlariga chuqur hamdardlik bildiramiz. Mazkur fojia oqibatida begunoh insonlarning hayotdan ko‘z yumgani barchamiz uchun og‘ir yo‘qotishdir, – deyiladi TIV xabarida.

O‘zbekiston AQShdagi vakolatxonalari vakillari marhumning qarindoshlari bilan doimiy aloqada bo‘lib, AQShning tegishli idoralari bilan hamkorlikda barcha masalalar yuzasidan yaqindan ish olib bormoqda.

• AQSh
• Otishma
• Talabalar
• Universitet