Rossiya Federatsiyasida ishlash jarayonida murakkab moliyaviy ahvolga tushib qolgan, turar joysiz qolgan, tazyiq yoki zo‘ravonlikka uchragan, shuningdek, majburiy mehnat qurboni bo‘lgan O‘zbekiston fuqarolariga moddiy va ijtimoiy yordam ko‘rsatiladi.

Migratsiya agentligining Rossiyadagi vakolatxonasi Moskva shahri va Moskva viloyatidagi 15 ga yaqin hostel hamda sutkalik mehmonxonalar bilan hamkorlik shartnomalarini imzoladi.

Turar joysiz qolgan va murakkab moliyaviy ahvolda bo‘lgan fuqarolar Moskva shahri, 1-Kazachiy tor ko‘chasi, 11/2-uy (Polianka metro bekati) manzilida joylashgan vakolatxonaga murojaat qilishi mumkin. Vaziyat o‘rganilgach, ularga 30 kungacha bepul yotoq joy ajratish imkoniyati yaratiladi.

Hozirda Shimoli-g‘arbiy, Ural, Sibir, Uzoq Sharq va Janubiy federal okruglarda ham hostel va mehmonxonalar bilan shartnoma tuzish ishlari olib borilmoqda.

Mazkur yordam choralari Vazirlar Mahkamasining 252-sonli qaroriga asoslanadi.

• Rossiya
• Yotoqxona
• migrant