"Sog‘liqni saqlash vazirligi faoliyatini yanada takomillashtirish chora-tadbirlari to‘g‘risida"gi Prezident Farmoni qabul qilindi.

Farmon bilan Aholining sog‘lom turmush tarzini qo‘llab-quvvatlash va jismoniy faolligini oshirish markazi Salomatlik va strategik rivojlanish instituti etib qayta tashkil qilindi.
Farmonga ko‘ra, quyidagilar ishlab chiqiladi:

- 2024-2026-yillarda sog‘lom turmush tarzini shakllantirish, to‘g‘ri ovqatlanishni tizimli targ‘ib qilish va ommalashtirish dasturi;

- 2023-yil yakunigacha “Aholi salomatligi – 2030” milliy strategiyasi.

Ma’lum qilinishicha, dasturni amalga oshirishda xalqaro tashkilotlar va xorijiy konsalting kompaniyalari jalb qilinadi. Bunda vazirlikka quyidagi vazifalar yuklatiladi:

– aholini maksimal qamrab olgan holda birlamchi tibbiy-sanitariya xizmatini unga yanada yaqinlashtirish;

– fuqarolarning sog‘lom turmush tarzini, sog‘lom ovqatlanishini va jismoniy faolligini qo‘llab-quvvatlash, ularni aholi orasida har tomonlama targ‘ib qilish;

– onalik va bolalikni muhofaza qilish, aholining bu boradagi ehtiyojlarini qondirish;

– ixtisoslashgan tibbiy yordam ko‘lamini kengaytirish;

– sog‘liqni saqlash tizimini to‘liq raqamlashtirish, qog‘ozbozlikka, asossiz byurokratiyaga va navbatlarga chek qo‘yish, aholiga tibbiyot muassasalariga murojaat qilganida qulayliklar yaratish;

– zamonaviy va samarali boshqaruv usullarini joriy qilish va tibbiy xizmatlar sifatini oshirish;

– kadrlar salohiyatini oshirish, tibbiy ta’lim va ilm-fanni rivojlantirish;

– xususiy sektorni rivojlantirish va investitsiyalarni jalb qilish hamda yirik davlat-xususiy sheriklik loyihalarini amalga oshirish;

– tibbiyot muassasalarining moddiy-texnika bazasini mustahkamlash;

– farmatsevtika tarmog‘ini samarali tartibga solish.

• Farmon
• SSV
• Shifokor
• salomatlik