Turkiyaning Beykoz tumani prokuraturasi Burak Oʻzchivitning hamkasblari tomonidan sudga kiritilgan shikoyatni koʻrib chiqdi. Tergovchilar aktyorning nomaqbul xatti-harakati uchun suddan qamoq jazosini talab qilishgan.

Hamkasblar oʻrtasidagi tushunmovchilik oktyabr oyining oʻrtalarida sodir boʻlgan. Maʼlum boʻlishicha, aktyor Burak Oʻzchivit “Qurilish: Usmon” serialining suratga olish jarayonida atrofdagilarga nisbatan qoʻpol muomalada boʻlgan, ularni bir necha bor haqorat qilgan. Aktyorning hamkasblari ushbu voqeaning guvohiga aylanganlar.

Prokuratura ayni vaqtda bir nechta shaxsni haqorat qilgani uchun aktyorga nisbatan ayblov xulosasini tuzgan. Ushbu hujjatga koʻra, Burak Oʻzchivit 3 oydan 4 yilgacha qamoq jazosini olishi mumkin.

Ayblov xulosasi Beykoz tumani sudiga yuborilgan.

Oʻzchivitning oʻzi barcha ayblovlarni rad etmoqda. U suratga olish guruhi vakillari bilan yaxshi munosabatda ekani, yuzaga kelgan janjal yovuz niyatli kimsalarning qilmishi ekanligini taʼkidlagan.

Burak Oʻzchivitni bir nechta hamkasblari ham qoʻllab-quvvatlaganlar. Ammo, jurnalistlar ijodkorga qarshi boʻlib olishgan. Misol uchun, jurnalist Birsen Altuntush ushbu sud jarayoni oʻta muhim ekani, kimlardir oʻzini boshqalardan ustun qoʻyish huquqiga ega emasligini aytib oʻtgan.

• Kino
• mashhurlar