AQShning CNN, Politico va MS NOW nashrlari jurnalistlarining Oq uyga kirishi cheklangani ortidan Prezident Donald Tramp va uning administratsiyasidagi uch nafar yuqori lavozimli amaldorga qarshi federal sudga da’vo arizasi kiritdi. Bu haqda Politico xabar berdi.

Nashrlarning ta’kidlashicha, Oq uyning jurnalistlar akkreditatsiyasini bekor qilishi AQSH Konstitutsiyasining Birinchi tuzatishida kafolatlangan matbuot erkinligiga zid. Ular jurnalistlarining Oq uyga kirish huquqini tiklashni talab qilmoqda.

OAVlarning qo‘shma bayonotida aytilishicha, Oq uy jurnalistlarning akkreditatsiyasini oldindan ogohlantirmasdan va tegishli protseduralarga rioya qilmasdan bekor qilgan. Nashrlar bu qaror ularning reportajlariga bildirilgan e’tirozlar bilan bog‘liq deb hisoblaydi.

Da’vogarlar Vashingtondagi AQSH okrug sudidan administratsiyaning harakatlarini konstitutsiyaga zid deb topishni hamda ularning ijrosini to‘xtatishni so‘ragan.

Da’voda Trampdan tashqari Oq uy apparati rahbari Syuzi Uayls, kommunikatsiyalar bo‘yicha direktor Stiven Cheng va AQSH Maxfiy xizmati direktori Shon Karran ham javobgar sifatida ko‘rsatilgan.

Ma’lumot uchun, 18-sentabr kuni Tramp CNN, MS NOW va Politico muxbirlarining Oq uyga kirishini cheklashini ma’lum qilgan. Prezident bunga mazkur nashrlar tarqatayotgan xabarlarni tanqid qilgan holda izoh bergan.

Keyingi kuni uchala nashr jurnalistlari Oq uyga kiritilmaganini ma’lum qilgan. Shundan so‘ng Tramp ijtimoiy tarmoqdagi sahifasida CNN, MSNBC va Politico logotiplari tushirilgan axlat xaltalari tasvirini ham e’lon qilgan.