Avstraliyalik olimlar yangi missiya doirasida Oyda o‘simliklar yetishtirishni rejalashtirmoqda. Tajriba 2025-yilga mo‘ljallangan.

Kvinslend texnologiya universiteti biologi Brett Uilyamsning so‘zlariga ko‘ra, urug‘lar Isroilda tayyorlangan “Beresheet 2” kosmik apparati yordamida Oyga yetkaziladi.

O‘simlik turlari hali aniqlanmagan. Olimlar ekstremal sharoitlarga yaxshi bardosh beradigan va tez o‘sadigan urug‘larni tanlash niyatida. Mumkin bol‘gan nomzodlardan biri Avstraliyaning “tirilish o‘ti” bo‘lib, u uzoq vaqt suvsiz yashay oladi.

O‘simliklar havo o‘tkazmaydigan kameraga joylashtirilishini va o‘sish sur’atlarini kuzatishni rejalashtirmoqda. Ishlab chiquvchilarning fikricha, loyiha oyni mustamlaka qilish yo‘lidagi muhim qadam bo‘ladi. Kelajakda Oyda kislorod, oziq-ovqat va dori-darmonlar ishlab chiqarish uchun zarur bo‘lgan o‘simliklarni yetishtirish rejalashtirilgan.

Olimlar, shuningdek, ekstremal sharoitlarda o‘simliklarni yetishtirish texnologiyasi nafaqat Oyda, balki Yerda ham foydali bo‘lishi mumkinligini ta’kidladilar. Klimatologlarning ogohlantirishicha, iqlimning yanada isishi bilan ko‘plab qishloq xo‘jaligi yerlari dehqonchilik uchun yaroqsiz bo‘lib qolishi mumkin.

• Koinot
• ilm-fan
• kosmos
• qiziqarli