Professional boksning super og‘ir vaznidagi o‘zbekistonlik bokschi Bahodir Jalolov keyingi jangi bo‘yicha ma’lumotlar bilan o‘rtoqlashdi.
Bokschi avval kutilganidek, 5-aprel kuni Qozog‘istonning Astana shahrida Top Rank tashkil etadigan boks oqshomida ringga ko‘tariladi.
Boks oqshomida Jalolovga kim raqiblik qilishi haqida aniq ma’lumotlar mavjud emas. Ammo ko‘pchilik o‘sha kuni Bahodirning qozog‘istonlik Ivan Dichko bilan jang qilishini taxmin qilmoqda.
Eslatib o‘tamiz, Jalolov 7-fevral kuni Kanadaning Monreal shahridagi boks oqshomida fransiyalik Devid Spilmont bilan jang qilishi kerak edi. Ammo, tashkilotchilar Bahodirning yuzidagi uchuq sabab jangni bekor qilishgandi.
Shundan keyin Jalolov ham, Spilmont ham tez orada boshqa manzilda jang o‘tkazishga tayyor ekanliklarini bildirishgan edi.
5-aprel kuni “Baris Arena”da o‘tkaziladigan turnirning markaziy jangida o‘rta vazn toifasida IBF va WBO yo‘nalishlari chempioni qozog‘istonlik Janibek Alimxanuli (16-0, 11 nokaut) kelib chiqishi kongolik, hozirda Fransiya sharafini himoya qilayotgan Anauel Ngamissenge (14-0, 9 nokaut)ga qarshi ringga ko‘tariladi.
31°
Kechasi 18°
