Bugun AQShning Nevada shtati Las-Vegas shahrida navbatdagi professional boks oqshomi bo‘lib o‘tdi.

Musobaqa doirasida super o‘rta vazn toifasidagi o‘zbekistonlik charm qo‘lqop ustasi Bektemir Meliqo‘ziyev Gana vakili Sena Agbekoga qarshi ringga ko‘tarildi. O‘n raundga mo‘ljallangan jang yettinchi raundda Bektemir “Bully”ning texnik nokautli g‘alabasi bilan yakunlandi. Meliqo‘ziyevning kuchli zarbasidan so‘ng referi hisobni ochdi va jang to‘xtatildi. Meliqo‘ziyev shu tariqa o‘ziga tegishli WBA qit’alararo chempionlik kamarini himoya qildi. 

“Bu jangga xuddi avvalgilarida bo‘lgani singari jiddiy tayyorgarlik ko‘rgandim. Afsuski, birinchi raunddagi kutilmagan jarohat biroz pand berib qoldi. Raqibim bosh bilan zarba berib yubordi va natijada qoshim yorildi. Shunga qaramay, o‘zim uchun muhim g‘alabani qo‘lga kirita oldim va bundan juda xursandman. Meni qo‘llab-quvvatlash uchun kelganlar, televizor qarshisida jangimni tomosha qilgan barchaga rahmat aytmoqchiman. Ketma-ket ikkita jangda g‘alaba qozondim. Maqsadim – jahon chempionlik kamari! O‘ylaymanki, tez orada birgalikda bu kamarni O‘zbekistonga olib ketamiz. Men chempionlik jangiga tayyorman”, – dedi Meliqo‘ziyev. 

Ma’lumot uchun, 29 yoshli Bektemir prof faoliyati davomida 18 ta jang o‘tkazib, 17 ta g‘alaba va 1 ta mag‘lubiyat qayd etgan. Uning bugungi raqibi 33 yoshli Sena Agbeko hisobida esa 29 ta g‘alaba bor, bugun u beshinchi mag‘lubiyatini qabul qilib oldi.

• AQSh
• Boks
• Las-Vegas