Rossiya Federatsiyasi prezidenti Vladimir Putin barcha ukrainaliklar uchun Rossiya fuqaroligini soddalashtirilgan tarzda olish haqidagi farmonni imzoladi.

Ushbu farmonga ko‘ra endilikda nafaqat DXR , LXR, Xerson va Zaporojye viloyatlari, balki butun Ukraina aholisi ham soddalashtirilgan tartibda Rossiya fuqaroligini olish uchun murojaat qilishlari mumkin. Pasport olish uchun ular avvalgidek Rossiya Federatsiyasida besh yil yashashlari, rus tilidan imtihon topshirishlari va daromad manbaiga ega bo‘lishlari shart emas.

“Gap bizning qardosh Ukraina xalqi, shuncha yillardan beri fashistlar tuzumi boʻyinturugʻi ostida boʻlgan odamlar haqida ketmoqda. Biz dindoshlarimiz, biz slavyanlarmiz, biz bir xil madaniyatli odamlarmiz, tilimiz juda o‘xshash, bizda juda ko‘p oilaviy, do‘stona rishtalar mavjud. Menimcha, bu (Putinning farmoni) Rossiyaga qarshi loyihaga munosib javobdir”, — deydi Federatsiya Kengashi rahbari Valentina Matviyenko hujjatning qabul qilinishiga izoh berib.

Bundan tashqari, fuqarolikka qabul qilish bo‘yicha arizani ko‘rib chiqish bir yil emas, balki uch oy davom etadigan qilib belgilandi.

Shuningdek, o‘zining mustqailligini e'lon qilgan “Donetsk Xalq Respublikasi (DXR) va Lugansk Xalq Respublikasi (LXR) fuqarolari yoki butun Ukraina hududida doimiy yashovchi fuqaroligi bo‘lmagan shaxslar, shu jumladan, ilgari Rossiya fuqaroligiga ega bo‘lgan va Rossiya fuqaroligidan voz kechganlar soddalashtirilgan tartibda Rossiya Federatsiyasi fuqaroligiga qabul qilish uchun ariza berish huquqiga ega”, – deyiladi farmonda.

Ushbu toifadagi fuqarolar Rossiya pasportini olish uchun odatiy shartlarni bajarmasdan hujjatlarni oladilar. Ilgari bu jarayon uchun faqat Rossiya Federatsiyasida besh yil yashab, tirikchilik manbai bo‘lgan va rus tilidan imtihonni muvaffaqiyatli topshirgan kishilargina qabul qilinar edi.

Ukraina armiyasida harbiy xizmat yoki DXR va LXR huquqni muhofaza qilish organlarida ishlash arizani rad etish uchun asos bo‘lmaydi. Fuqarolik soddalashtirilgan tartibda DXR, LXR yoki butun Ukraina hududida doimiy yashovchi shaxslarga, ularning farzandlariga, shu jumladan asrab olingan bolalarga, turmush o‘rtoqlarga va ota-onalarga” beriladi. Bunday holda, doimiy yashash joyini tasdiqlovchi hujjat bo‘lishi kerak.

Pasport olish uchun ariza berishda sizga Rossiya Federatsiyasida qolish (yashash) huquqini tasdiqlovchi hujjatlardan biri (migratsiya kartasi, vaqtinchalik yashash uchun ruxsatnoma, yashash uchun ruxsatnoma, qochqin guvohnomasi, vaqtinchalik boshpana guvohnomasi) yoki fuqarolik guvohnomasi kerak bo‘ladi.

• Farmon
• Fuqarolik
• Rossiya
• Ukraina