Bugun Serbiyaning Nish shahrida boks bo‘yicha ayollar o‘rtasidagi jahon chempionatining so‘nggi hal qiluvchi final bellashuvlari o‘tkaziladi.

Chempionatning final bahsida faqatgina bir nafar o‘zbekistonlik sportchi – Navbahor Hamidova ishtirok etadi. Bokschi -66 kg. vazn toifasida oltin medal uchun o‘tadigan raqobatda turkiyalik Busenaz Surmenega qarshi ringga ko‘tariladi.  

Kuni kecha jahon chempionatining final janglari oldidan bokschilar o‘rtasida nigohlar to‘qnashuvi bo‘lib o‘tdi.

Shuningdek, kecha dunyo birinchiligida chorak finalda yurishini to‘xtatgan bokschilar 10 ming AQSh dollar pul mukofoti bilan taqdirlandi. Ushbu taqdirlash marosimida Sitora Turdibekova, Sohiba Ro‘zmetova, Nigina O‘ktamova hamda Aziza Zokirova kabi O‘zbekiston charm qo‘lqop ustalari ham ishtirok etdi va pul mukofoti bilan taqdirlandi.  

Ma’lumot uchun, IBA tomonidan o‘tkazilayotgan jahon chempionatida oltin medal sohiblari 100 ming AQSh dollari pul mukofoti bilan taqdirlanadi. Kumush medal uchun esa 50 ming, bronza medaliga 25 ming AQSh dollari beriladi. Musobaqa tarixida ilk bor chorak finalga chiqqan barcha sportchilar 10 ming AQSh dollari bilan rag‘batlantiriladi.

• Boks
• Final
• Jahon chempionati
• Serbiya