10°
Kechasi 3°
Bugun, 27-fevral kuni Saudiya Arabistonida yorqin boks oqshomi bo‘lib o‘tdi. Kechaning asosiy jangida taniqli “YouTube” blogeri Jeyk Pol va professional boks bo‘yicha superog‘ir vazn chempioni Tayson Fyurining ukasi Tommi Fyuri o‘zaro bahs olib bordi. Ushbu bahsni tomosha qilish uchun Saudiyaga ko‘plab yulduzlar tashrif buyurdi. Mayk Tayson, Tayson Fyuri, Krishtianu Ronaldu va boshqalar.
Jang to‘liq 8 raund davom etdi. Raqiblar haqiqiy shou tashkil qilishlariga hech qanday shubha yo‘q edi. Chunki Pol prof boksda 6 bahsda ringga ko‘tarilib, ularning barchasida g‘alaba qozongan edi. Britaniyalik Fyurining rekordi esa – 8:0.
Pol sportdagi faoliyatini 2020-yilda boshladi, ammo u allaqachon o'zini baland ovozda e'lon qilishga muvaffaq bo‘ldi. Uning qurbonlari ro‘yxatiga bloger Ali Eson Gib, basketbolchi Neyt Robinson, “Bellator” sobiq chempioni Ben Askren, UFC sobiq chempioni Tayron Vudli (ikki marta) va sayyoramizdagi eng yaxshi promoushenning yana bir taniqli faxriysi – Anderson Silva kiritilgan.
Fyuri nafaqat boksda o‘zini sinab ko‘rishga muvaffaq bo‘ldi, u hatto realiti-tanishuv shousini suratga olishga ham muvaffaq bo‘ldi. Shunga qaramay, jangchi asosiy e’tiborni sport karerasiga qaratadi. 2022-yilda Tommi bitta jang o‘tkazishga muvaffaq bo‘ldi. Uning raqibi Daniel Bochanski edi. Lo‘lilar qirolining ukasi raqibini nokautga uchratolmadi, ammo ochkolar bo‘yicha g‘alaba qozongan.
Birinchi raunddayoq raqiblar nokaut uchun harakat boshladi. Har ikki bokschi jangni muddatidan oldin tugatishni istashi sezildi.
Bellashuv davomida Fyuri zarbalar soni va ularning aniqligi jihatdan ustunlik qildi, Pol esa nokaut ovlashga harakat qildi.
Bokschilar munosib tarzda jang olib bordi va sakkiz raundning barchasini tik oyoqda o‘tkazishdi. Biroq so‘nggi raundda Jeyk Pol kuchli zarba evaziga Tommini nokdaun holatiga tushirishga muvaffaq bo‘ldi. Yakunda hakamlarning bo‘lingan qaroriga ko‘ra. Tommi Fyurining qo‘li baland ko‘tarildi.
Shu tariqa “Lo‘lilar qiroli”ning ukasi 9-g‘alabasini tantan qilgan bo‘lsa, Jeyk Pol ilk jiddiy sinovdayoq, mag‘lubiyat alamini tatib ko‘rdi.
Bugungi jangdan so‘ng Jeyk Pol 25 million, Tommi Fyuri esa 7 million dollar kafolatlangan gonorarga ega bo‘ldi.
O‘zbekiston va jahonda ro‘y berayotgan eng so‘nggi voqea-hodisalar, sport, shou-biznes, madaniyat, informatsion texnologiyalar va ilm-fan yangiliklaridan doimo xabardor bo‘ling!
O‘zbekiston va jahonda ro‘y berayotgan eng so‘nggi voqea-hodisalar, sport, shou-biznes, madaniyat, informatsion texnologiyalar va ilm-fan yangiliklaridan doimo xabardor bo‘ling!
