O‘zbekiston milliy terma jamoasi bosh murabbiyi Fabio Kannavaro Portugaliyaga qarshi uchrashuvdan so‘ng futbolchilarining harakatini yuqori baholadi.

“Jahon chempionatidagi ilk ishtirokimiz oson bo‘lmasligini bilardik. Qur’a natijalaridan so‘ng Kolumbiya va Portugaliya kabi kuchli raqiblar bilan bir guruhdan joy olganimizni ko‘rib, bizni qiyin sinov kutayotganini anglagandik. Kolumbiyaga qarshi o‘yindan keyin ham jamoam bilan faxrlanishimni aytgandim. Bugun ham shunday fikrdaman. Futbolchilarim qiyinchiliklarga duch kelishdi, ammo bir soniya ham taslim bo‘lishmadi”, — dedi Kannavaro.

Mutaxassisning ta’kidlashicha, Portugaliya kabi barcha chiziqlarda yuqori saviyali futbolchilarga ega jamoaga qarshi o‘ynash har doim murakkab bo‘ladi.

“Bu Jahon chempionati biz uchun muhim tajriba maktabi bo‘ladi. Ushbu turnir orqali o‘sishimiz, xulosa chiqarishimiz va kelajakda yanada kuchliroq jamoa bo‘lib qaytishimiz kerak”, — dedi O‘zbekiston terma jamoasi bosh murabbiyi.

Ma’lumot uchun, O‘zbekiston milliy terma jamoasi Xyuston shahrida bo‘lib o‘tgan uchrashuvda Portugaliyaga 5:0 hisobida imkoniyatni boy berdi.