2026-yildan boshlab O‘zbekistonda ishlab chiqarilganiga 30 yil va undan ortiq vaqt bo‘lgan avtomobillarni utilizatsiyaga topshirishning yangi tizimi joriy etiladi. Yangi tartibga ko‘ra, eskirgan transport vositalari davlat tomonidan bozor qiymatida xarid qilib olinadi. Avtomobil egalari uchun ikki turdagi kompensatsiya mexanizmi taklif etiladi. Fuqarolar mahalliy ishlab chiqarilgan yangi avtomobil xaridi uchun elektron vaucher olishlari yoki ushbu vaucher qiymatini pul shaklida qabul qilishlari mumkin bo‘ladi.

Qayd etilishicha, elektron vaucher yangi avtomobil xaridida boshlang‘ich to‘lov sifatida qo‘llaniladi. Qolgan mablag‘ni esa imtiyozli shartlar asosida muddatli to‘lov orqali qoplash imkoniyati yaratiladi. Mazkur tizim eskirgan transport vositalari sonini qisqartirish, ekologik holatni yaxshilash hamda avtoparkni yangilashga xizmat qilishi kutilmoqda.