Al Arabiya xabariga ko‘ra, Buyuk Britaniyada 30-iyul kuni aviadispetcherlik xizmatida sodir bo‘lgan texnik nosozlik tufayli 120 dan ortiq aviaqatnov bekor qilingan.

Bu holat London, Edinburg, Xitrou va Gatvik aeroportlariga ta’sir ko‘rsatgan.

Nosozlik chog‘ida London havo hududidagi samolyotlar soni cheklab qo‘yilgan. Garchi muammo tezda hal etilgan bo‘lsa-da, soat 19:30 (O‘zbekiston vaqti bilan 00:30)ga kelib 67 ta uchib ketish va 55 ta uchib kelish reysi bekor qilingan.

Ayrim samolyotlar boshqa hududlarga yo‘naltirilgan.

Aviadispetcherlik xizmati texnik nosozlik Angliyaning janubi-g‘arbidagi Svanvik boshqaruv markazida yuz berganini tasdiqlamoqda.

Nosozlik mahalliy vaqt bilan soat 16:00 atrofida aniqlanib, 1 soat mobaynida bartaraf etilgan.

Bu Britaniya aviadispetcherlik xizmati tizimida so‘nggi yillarda kuzatilgan eng yirik nosozliklardan biri bo‘lib, 2023-yilda ham shunga o‘xshash holat yuz bergandi.

O‘shanda 1,5 mingdan ziyod parvoz kechiktirilgandi. Nosozlik aynan yozgi ta’til paytida yuz berishi aviakompaniyalar rahbarlarining kuchli e’tiroziga sabab bo‘lmoqda.

Ryanair aviakompaniyasi operatsion direktori Nil MakMaxon aviadispetcherlik xizmati rahbari Martin Rolfning iste’fosini talab qilib, bunday holat yana takrorlangani “sharmandalik” ekanini ta’kidlagan.

“2023-yil avgustidagi nosozlikdan hech qanday xulosa chiqarilmagani ayon”, –dedi u.

Ma’lumot uchun, Buyuk Britaniyada yirik va kichik miqyosdagi jami 40 dan ortiq aeroport mavjud. Ulardan yiliga 100 milliondan ortiq yo‘lovchi foydalanadi.

• Buyuk Britaniya