Daniya parlamenti Falastinni davlat sifatida tan olish to‘g‘risidagi qonun loyihasiga qarshi ovoz berdi. Bu haqda “Reuters” xabar berdi.

Mazkur qonun loyihasi fevral oyidayoq to‘rtta so‘l partiya tomonidan taklif etilgan edi. Uni muhokama qilish chog‘ida aprelda Daniya tashqi ishlar vaziri Lars Lokke Rasmussen Falastin davlatini tan olish uchun “dastlabki shartlar yo‘q”ligini aytgandi. Biroq ovoz berish kuni Rasmussen parlament bu rezolyutsiyani qo‘llab-quvvatlay olmasa-da, “biz buni amalga oshira oladigan kun kelishini xohlaymiz”, deya qo‘shib qo‘ydi.

10-may kuni, BMT Bosh Assambleyasi Falastinning tashkilotga a’zoligi haqida rezolyutsiya qabul qilgach, Rasmussen bu qarorni qo‘llab-quvvatlagandi.

22-may kuni uchta Yevropa mamlakati — Ispaniya, Norvegiya va Irlandiya Falastinni davlat sifatida rasman tan olishini e’lon qildi. Mazkur qaror 28-may kuni kuchga kirdi. Isroil bosh vaziri Binyamin Netanyaxu buni “terrorizm uchun berilgan mukofot” deb atab, ushbu mamlakatlardan Isroil elchilarini chaqirib oldi.

Ayni paytda Falastin davlat sifatida rasman BMTga kiruvchi 193 ta mamlakatdan 143 tasi tomonidan tan olingan. Falastin davlatini tan olmaydiganlar orasida AQSh, Buyuk Britaniya, Fransiya va Germaniya bor.

• Daniya
• Falastin