Bu haqda Ukraina harbiy razvedkasi rahbari oʻrinbosari Vadim Skibiskiy The Guardian nashriga bergan intervyusida aytib oʻtdi. 

“Ukrainada 10-15 rus artilleriyasi uchun bitta artilleriya quroli bor. Ukraina kuniga 5-6 mingta artilleriya snaryadini ishlatadi.

Biz deyarli barcha oʻq-dorilarimizni tugatdik va hozir NATOning 155 kalibrli standart oʻqlaridan foydalanmoqdamiz”,  deya maʼlum qildi u. 

Amerikalik harbiy manbalar France Pressʼga ismini oshkor qilmaslik sharti bilan Yevropada Sovet va Rossiyada ishlab chiqarilgan qurol-yarogʻ va oʻq-dorilar zahiralari tugab qolgani, shu sababli Ukraina endi faqat Gʻarb qurol-yarogʻ taʼminotiga qaram boʻlib qolganini aytdi.

Urushning dastlabki bosqichlarida Gʻarb davlatlari Ukrainaga asosan ukrainlarga tanish boʻlgan sovet uslubidagi qurollarni joʻnatgan. Bunday qurollar zahiralari Sharqiy Yevropaning koʻplab mamlakatlarida saqlangan, ammo hozir ular, France Press manbasining soʻzlariga koʻra, “yer yuzidan gʻoyib boʻldi”.

Gʻarb Ukrainaga ogʻir qurol va oʻq-dorilar yetkazib berishni bosqichma-bosqich oshirmoqda, ular qaysidir maʼnoda rossiyalik hamkasblaridan ustun boʻlishi mumkin, ammo ulardan foydalanish ancha uzoq tayyorgarlikni talab qiladi va ularning soni hali ham yetarli emas. Oʻtgan hafta Qoʻshma Shtatlar Ukrainaga toʻrtta HIMARS raketa tizimini topshirishni eʼlon qildi. Boshqa mamlakatlardan, masalan, Buyuk Britaniyadan yetkazib beriladigan mahsulotlar bilan bir qatorda, ularning soni biroz koʻproq boʻlishi mumkin, ammo, Ukraina prezidenti devoni rahbari maslahatchisi Mixail Podolyak payshanba kuni mamlakatga toʻliq huquqli qarshi hujum uchun hech boʻlmaganda 150 ta shunday tizim kerak ekanligini aytdi.

• Rossiya
• Ukraina
• Urush