DXXning Namangan va Xorazm viloyatlari bo‘yicha boshqarmasi hamda Bosh prokuratura huzuridagi Iqtisodiy jinoyatlarga qarshi kurashish Departamentining hududiy boshqarmalari xodimlari tomonidan yer oldi-sotdisi bo‘yicha qator jinoyatlarni fosh qildi.

DXX Matbuot xizmatining xabar berishicha, Namangan viloyatidagi tumanlardan birining davlat soliq inspeksiyasi boshlig‘i o‘zining haydovchisi nomida bo‘lgan sabzavotchilikka ixtisoslashgan fermer xo‘jalikning 1 gektar yer maydonini boshqa bir fuqaro nomiga rasmiylashtirib berish evaziga 15 ming AQSh dollari talab qiladi.

Olib borilgan tezkor tadbirda, u so‘ralgan pulni xizmat xonasida olgan vaqtida ashyoviy dalillar bilan ushlandi.

Shuningdek, Xorazm viloyati Favqulodda vaziyatlar boshqarmasi xodimi (1990-y.t.) mahalliy fuqaro bilan kelishgan holda, Urganch tumanidagi MChJ balansida bo‘lgan 30 sotix yer maydonini tadbirkorlik bilan shug‘ullanmoqchi bo‘lgan shaxs nomiga tanishlari orqali rasmiylashtirib berish evaziga 50 ming AQSh dollari talab qilishadi.

Mazkur shaxs ham huquqni muhofazi qiluvchi organlar xodimlari tomonidan o‘tkazilgan tezkor tadbirda, ular so‘ralgan puldan 30 ming AQSh dollarini olgan vaqtlarida ushlandi.

Eslatib o‘tamiz, avvalroq Qoraqalpog‘iston IIV xodimining korrupsion jinoyati bilan bog‘liq holat bo‘yicha ma’lumot berilgan edi.

• Bosh prokuratura
• DXX
• Jinoyat
• Korrupsiya
• Namangan
• Xorazm