Eron prezidenti Mas’ud Pezeshkiyon mamlakat qo‘shni davlatlarga hujum qilmaslikka qaror qilinganini ma’lum qildi. Uning aytishicha, bu qaror kecha bo‘lib o‘tgan rahbariyatning muvaqqat kengashi yig‘ilishida qabul qilingan.

“Kecha rahbariyatning muvaqqat kengashida shunday qaror qabul qilindi: endi qo‘shni davlatlarga hujum qilinmaydi va raketa uchirilmaydi. Faqat o‘sha davlat hududidan Eronga hujum qilingan taqdirdagina javob qaytariladi”, – dedi u.

Pezeshkiyonning ta’kidlashicha, Eron hech qanday shartlarsiz taslim bo‘lishi haqidagi talablar amalga oshmaydi.

“Bizni shartsiz taslim bo‘ladi deb o‘ylash – orzu xolos”, – dedi Eron rahbari.

Shu bilan birga, u qo‘shni davlatlardan uzr so‘rab, Eron boshqa davlatlarga qarshi tajovuz qilish niyatida emasligini ta’kidladi.

“Biz boshqa mamlakatlarga tajovuz qilish niyatida emasmiz. Barcha kelishmovchiliklar, xavotirlar va ranjishlarni chetga surib, birgalikda harakat qilishimiz kerak”, – dedi u.

Pezeshkiyon, shuningdek, mamlakat hozirgi vaziyatda o‘z hududini himoya qilishga majbur ekanini aytdi.

“Bugun o‘z yurtimiz hududini himoya qilishimiz kerak, shunda Eron bu inqirozdan boshi baland ko‘targan holda chiqadi”, — dedi u.

Eron prezidenti mamlakat aholisiga minnatdorlik bildirib, xalqaro huquq normalariga rioya qilinmayotganini ham ta’kidladi.

Uning so‘zlariga ko‘ra, “dushmanlar xalqaro qonunlarni inobatga olmasdan tibbiyot muassasalari, shifoxonalar va boshqa obyektlarga ham zarba bermoqda”.

• Bayonot
• Eron
• Prezident