“Zang” filmini suratga olish ishlarida chiroq ustasi sifatida ishtirok etgan Sergey Svetnoy operator Galina Xatchinsni tasodifan otib qoʻygani uchun aktyor Alek Bolduin va suratga olish jamoasining bir nechta aʼzolarini sudga berdi.

Los-Anjeles Oliy sudiga taqdim etilgan daʼvoda yigirmaga yaqin ayblanuvchilar, jumladan suratga olish ishlarida aktyor va prodyuser sifatida ishtirok etgan Alek Bolduin, rejissyor yordamchisi Devid Xolls va qurol-yarogʻ uchun masʼul xodim Anna Guterres Rid haqida gap boradi.

Kelib chiqishi ukrainalik boʻlgan Sergey Svetnoy marhuma Xatchinsning yaqin doʻsti boʻlgan. Erkak “Zang” ular birgalikda ishlagan toʻqqizinchi film ekani, mazkur filmda unga koʻp haq toʻlanmasa ham, doʻsti Galina Xatchinsning iltimosiga koʻra ish boshlaganini taʼkidlagan.

Daʼvogar operator Galina Xatchinsning oʻlimiga sabab boʻlgan oʻq unga ham tegishiga bir baxya qolgani, Galina oʻlgan vaqtda uning yonida boʻlgani, suratga olish ishlariga masʼuliyatsizlik bilan yondashish oqibatida yuz bergan fojia unga ogʻir ruhiy zarba bergani haqida gapirgan.

Eslatib oʻtamiz, joriy yilning 21-oktyabr kuni “Zang” filmini suratga olish maydonchasida aktyor Alek Bolduin operator Galina Xatchinsni tasodifan otib qoʻygan va uning oʻlimiga sababchi boʻlgan edi.

• Kino
• mashhurlar