Toshkent shahri hududida atmosfera havosining sifatiga ijobiy ta’sir ko‘rsatadigan mikroiqlim barqarorligini ta’minlash maqsadida sun’iy ko‘l va suv havzalari tashkil etiladi. Bu haqda Prezidentning “Toshkent shahrida ekologik vaziyatni yaxshilash bo‘yicha kechiktirib bo‘lmaydigan chora-tadbirlar to‘g‘risida”gi farmonida aytib o‘tildi.

Farmonga muvofiq, Suv xo‘jaligi vazirligi “O‘zsuvtaminot” AJ bilan hamkorlikda uch oy muddatda Toshkentning sharq, g‘arb, shimol va janub yo‘nalishlarida kamida uchtadan sun’iy ko‘l va suv havzalari tashkil etishi lozim. Mazkur suv inshootlari mikroiqlimni stabillashtirish, havodagi chang konsentratsiyasini kamaytirish va mahalliy bioekologiyani yaxshilashga xizmat qilishi kutilmoqda.

Shu bilan birga, farmonda yoz-kuz mavsumida asosiy yo‘llar chetidagi daraxt va butalarni haftada uch marta, kunning birinchi yarmida yuvib turish vazifasi ham belgilab qo‘yildi.

Qo‘shimcha ravishda, jismoniy va yuridik shaxslar egaligidagi hududlardagi daraxt va o‘simliklarni sug‘orish maqsadida ichimlik suvidan foydalanishga qo‘yilgan vaqtlik cheklov bahor va yoz oylarida bekor qilinadi. Tungi 23:59 dan 05:00 gacha amal qilgan talab endi qo‘llanilmaydi. Biroq ichimlik suvini boshqa maqsadlarda ishlatishga doir cheklovlar o‘z kuchida qoladi.

Shuningdek, Toshkent shahri hududidagi favvoralar soni 2 barobarga ko‘paytiriladi. Bu Umummilliy ekologik muammolarni bartaraf etish davlat maqsadli jamg‘armasi mablag‘lari hisobidan amalga oshiriladi.

• Ko'llar
• Prezident
• Qaror
• Toshkent