Biz baʼzi hind aktrisalarining ismlarini bolalikdan eslaymiz. Bu aktrisalar nafaqat isteʼdodli, balki oʻziga xos uslub egasi hamdir.

Ayshvariya Ray

Koʻpchilik taniqli aktrisa Ayshvariya Ray oʻzining aktyorlik faoliyatini 1994-yilda “Dunyo goʻzali” tanlovidagi gʻalabasi tufayli boshlaganiga ishonadi. Ayrimlar uning isteʼdodi aktrisalik uchun yetarli emasligi, uni kino olamida faqatgina chiroyi ushlab turganini aytishadi. Ammo, ushbu maʼlumot asosli emas. Ayshvariya ishtirokidagi “Devdas” (2002) filmi ming yillikning eng yaxshi filmlaridan biri sifatida tan olingan.

Frida Pinto

Frida Hindistonning Bombey shahrida tugʻilgan boʻlsa-da, uning ota-onasi aslida portugaliyalik. Aktrisaning familiyasi portugal tilidan tarjima qilinganda “kichik qush” degan maʼnoni anglatadi . U 11 yoshidan boshlab aktrisa boʻlishga qiziqqan. Ammo karerasini boshlashdan oldin 2 yil davomida professional model sifatida ishlagan.

Frida Pinto Oskar mukofotiga sazovor boʻlgan “Xarobadan chiqqan millioner” filmidagi bosh qahramonning sevgilisi rolidan soʻng yuksak eʼtiroflarga sazovor boʻldi. Shundan soʻng oʻzini koʻp qirrali aktrisa sifatida koʻrsatdi, “Maymunlar sayyorasining yuksalishi” fantastik filmida va Vudi Allenning komedik dramasida rol oʻynadi. Oradan koʻp oʻtmay “Janob Malkolmning roʻyxati” tarixiy dramasi ekranga chiqdi, unda Frida bosh rolni ijro etdi.

Priyanka Chopra

Priyanka Chopra – nafaqat Bollivudda, balki Gollivudda ham mashhur aktrisa hisoblanadi. Priyanka maktabni tamomlagach dasturchi yoki sud psixologi boʻlishni xohlagan. Biroq, 2000 yilda “Dunyo goʻzali” unvonini qoʻlga kiritib, kinodagi faoliyatini boshlagan.

Chopraning aktrisa Sofi Terner bilan bogʻliqligi bor. Ularning turmush oʻrtoqlari musiqachi Nik va Jo Jonaslar aka-uka, Priyanka Chopra va Sofi Terner ovsinlar hisoblanadi.

Karina Kapur

Karina mashhur hind rejissyori va aktyori Raj Kapurning nabirasi. U bolalikda aktrisa boʻlishni xohlamagan, Garvardda mikrokompyuterlar va axborot texnologiyalarini oʻrgangan. Ammo, oradan bir muncha vaqt oʻtgach, Karina sulola anʼanasini davom ettirishga qaror qildi.

Uning ishtirokidagi eng mashhur filmlar – “Uch savdoyi”, “Men bilan doʻst boʻlasizmi?”, “Gohi shodlik, gohi gʻam“ hisoblanadi. Aktrisa 2 ta avtobiografik kitob ham yozgan.

Kajol Devgan

Kajol Devgan – aktyorlar sulolasining davomchisi. U Bollivudning eng mashhur aktrisalaridan biri hamdir. Kajol ishtirokidagi eng mashhur filmlar – “Mening ismim Xon”, “Hayotda hamma narsa boʻladi”, “Gohi shodlik gohi, gʻam” va “Oʻgʻirlanmagan kelin” hisoblanadi.

1999 yilda Kajol aktyor va rejissyor Ajay Devgan bilan turmush qurgan, juftlikning 2 nafar farzandi bor. Kajol boʻsh vaqtini xayriya ishlariga bagʻishlaydi va sheʼrlar yozadi.

Sushmita Sen

Sushmita “Dunyo goʻzali” unvonini qoʻlga kiritgan birinchi hindistonlik hisoblanadi. Oʻsha vaqtlarda Sushmita 18 yoshda boʻlgan. Bir necha yil oʻtgach, kino olamiga kirib kelgan. Sushmitaning eng katta va muvaffaqiyatli loyihasi mashhur aktyor Shohrux Xon bilan birgalikda ishlagan “Men yoningdaman! ” filmi boʻlgan.

Aliya Bxatt

Aliya Bxatt rejissyor Mahesh Bxatt va aktrisa Soniya Razdan oilasida tugʻilgan. U oʻsmirlikdan kinoda suratga tusha boshlagan va muvaffaqiyatga erishgan. “Uchib ketayotgan Panjob” nomli dramadagi roli uchun “Eng yaxshi aktrisa” sifatida Hindiston Oskarini olgan. 2022-yilda Aliya Raj Kapurning nabirasi Ranbir Kapur bilan turmush qurdi.

Aliya Bxatt filmlardagi faoliyatidan tashqari atrof-muhitni muhofaza qilish kampaniyalarida ishtirok etadi. Aktrisa shuningdek, oʻzining ayollar kiyimlari brendini ishlab chiqqan. Uning ishtirokidagi soʻnggi filmlardan biri – “Gangubay Katavadi” Berlin kinofestivalida namoyish etilgan.

• Kino
• bollivud
• mashhurlar