Ijtimoiy tarmoqlarda Toshkent viloyatining Oqqo‘rg‘on tumanida IIB xodimi telefondagi suhbat chog‘ida nomaqbul so‘zlar aytgani qayd etilgan audioyozuv tarqalib, muhokamalarga sabab bo‘lmoqda. Holat yuzasidan IIBB matbuot xizmati rahbari Bobur To‘laganov izoh berdi.

Qayd etilishicha, mazkur holat IIBB tomonidan o‘rganilgan va ma’lum bo‘lishicha audio yozuv tegishli ekani aytilayotgan fuqaro, 1992-yilda tug‘ilgan A.Sulaymonov, 2022-yilda Oqqo‘rg‘on tumani IIB profilaktika inspektori lavozimiga qabul qilingan.

To‘laganovning ta’kidlashicha, yosh xodim ko‘p o‘tmay xizmat faoliyati davomida o‘zini salbiy tomondan ko‘rsatganligi va noo‘rin xatti-harakatlari sababli joriy yil 30-avgust kuni ichki ishlar organlaridan bo‘shatilgan.

Hozirda xabarda ko‘rsatilgan “audio yozuv” aslida kimga tegishli ekanini aniqlashga qaratilgan ekspertiza va surishtiruv ishlari o‘tkazilmoqda.

“Shu o‘rinda hurmatli fuqarolarimizga, xabardagi holat Prokuratura tomonidan nazoratga olinganligini, to‘liq o‘rganilib qonuniy chora ko‘rilishini ma’lum qilamiz”, – deyiladi xabarda.

• IIBB
• Suhbatdosh
• Telefon