Butunjahon boks assosiasiyasi (WBA) yarim o‘rta vazn toifasi vakillari (-69,85 kg) Isroil Madrimov (8-0, 6 KO) va Mishel Soro (35-3-1, 24 KO) o‘rtasida chempionlik kamariga majburiy da’vogar maqomi uchun revansh jangi o‘tkazilishini e’lon qildi.

Qayd etilishicha, 2021 yilning 17 dekabr kuni Toshkentda bo‘lib o‘tgan birinchi jang natijasi saqlanib qolinadi. 

O‘sha jangning 9-raundida Madrimov gong ovozini eshitmagan va raqibga bir necha zarbalar yo‘llashi natijasida texnik nokaut qayd etilgan edi. Bundan norozi bo‘lgan Soro jamoasi tashkilotga revansh berilishini so‘rab murojaat qilgan. WBA esa Soro jamoasining so‘rovini qabul qildi va Madrimovga revansh jangida ishtirok etish majburiyatini qo‘ydi.

Ma’lum qilinishicha, tomonlarga jang bo‘yicha muzokaralarni yakunlash uchun 30 kun muhlat belgilandi. Kelishuv amalga oshmagan taqdirda ochiq promouterlik savdosi bo‘lib o‘tadi.

Eslatib o‘tamiz, ushbu vaznda WBA Super kamari ayni damda Jermell Charloga (34-1-1, 18 KO) tegishli hisoblanadi. Charlo WBA, WBC, IBF va WBO chempionlik unvonlari uchun Brayan Kastanoga (17-0-2) qarshi revansh jangida ishtirok etadi. Madrimo-Soro bellashuvi g‘olibi esa WBA Super chempionlik kamari uchun da’vogarga aylanadi.

• Boks