2022-yilning 10-sentabr kuni O‘zbekiston jurnalistika va ommaviy kommunikatsiyalar universiteti Odob-axloq komissiyasining kengaytirilgan tarkibdagi yig‘ilishi bo‘lib o‘tgan.

Mazkur yigʻilishda joriy yilning 9-sentyabr kuni universitet talabasi J.Mahmudov hamda universitet xodimlari U.Rustamov, X.Mirzayev, F.Ochilovlar oʻrtasida boʻlib oʻtgan kelishmovchilik holati koʻrib chiqilgan.

Oʻrganishga koʻra, universitet xodimi X.Mirzayev talaba bilan oʻzaro qoʻpol muomala sababli shaxsiy tortishuvga borganligi maʼlum boʻldi. Vaziyat universitet profilaktika noziri H.Sodiqov tomonidan oʻrganib chiqilgan va shu kunning oʻzida tomonlar yarashuvi qarori qabul qilinib, masalaga yechim berilganligi aniqlangan.

Biroq, yarashuv qarori qabul qilinganiga qaramay, universitet ichki mehnat tartibi qoidalari buzilganligi yuzasidan chora koʻrilishi lozim deb topilgan.

Mavzuga doir: Jurnalistika universitetida talaba rektorga salom bermaganlikda ayblanib kaltaklangani aytilmoqda (audio)

Mehnat kodeksining 181-moddasida nazarda tutilgan intizomiy jazo chorasi yaʼni, oʻz vakolati doirasidan tashqariga chiqqanligi sababli X.Mirzayev egallab turgan lavozimidan ozod etildi va u bilan tuzilgan mehnat shartnomasi bekor qilindi.

Boshqa xodimlar U.Rustamov va F.Ochilovga nisbatan hayfsan intizomiy chorasini qoʻllash yuzasidan qaror qabul qilingan.

Shuningdek, Universitet rahbariyatiga oʻz vaqtida xabar bermaganligi sababli profilaktika noziri kapitan H.Sodiqovga nisbatan tegishli chora koʻrilishi uchun tuman Ichki ishlar organiga tavsiya yuborilgan.

“Shuni yana bir bora taʼkidlaymizki, Universitet maʼmuriyati ustoz-shogird anʼanalari, talabalar huquqini himoya qilish va jamoada oʻzaro hurmat kabi qadriyatlarga qatʼiy rioya qiladi”, – deyiladi rasmiy bayonotda.

• Hayfsan
• Jurnalistika
• Oliy ta'lim
• rasmiy munosabat