Koreyalik rejissyor va ssenariynavis Xvan Don Xyok “Netflix” platformasining eng mashhur loyihalaridan biri – “Kalmar oʻyini” serialining olamshumul muvaffaqiyatga erishishi haqida satira suratga oladi.

Komedik loyihaga “Sayyoradagi eng yaxshi shou” deb nom berilgan. Rejissyorning aytishicha, unda “Kalmar oʻyini” serialining suratga olinish jarayoni, loyihaning kutilmagan muvaffaqiyati, rejissyor mashhurlikka erishganidan keyin qanday bosimga duch kelgani haqida gap boradi. “Sayyoradagi eng yaxshi shou” qachon va qaysi platforma orqali taqdim etilishi hozircha aniq emas.

“Birinchi mavsumning erishgan muvaffaqiyati menga juda katta masʼuliyat yukladi, loyihaning ikkinchi mavsumi bunday shov-shuvga sabab boʻla olmasligi haqida qoʻrqinchli tushlar koʻraman”, deydi rejissyor.

Maʼlumot uchun, “Kalmar oʻyini” seriali oʻtgan yilning sentyabr oyida “Netflix” tomonidan taqdim etilgan va strimingdagi eng mashhur serial sifatida tan olingan edi. Uni taqdimotdan keyingi 11 kun ichida 11 million nafar foydalanuvchi tomosha qilgan, ushbu koʻrsatkich 1 oy ichida 111 millionga yetgan.

• Kino
• Madaniyat
• Serial
• Shou-biznes
• mashhurlar