“Space Entertainment Enterprise” kompaniyasi kosmosda kinostudiya va sport arenasi qurish rejasi haqida maʼlum qildi.

Xabar berilishicha, suratga olish maydonchasi 2024-yilning qish faslida ish boshlaydi va unga SEE-1 deb nom beriladi. Studiyada filmlar, teledasturlar suratga olinadi, musiqa va sport tadbirlari oʻtkaziladi.

“SEE-1 – insoniyat uchun boshqa bir reallikka oʻtish va kosmosda yangi sahifa ochishning ajoyib imkoniyatidir”, deyiladi kompaniya bayonotida.

Rejaga koʻra, stansiyadan turib jonli efirlar olib borish mumkin boʻladi.

Modulni yaratish vazifasi “Axiom Space” kompaniyasi zimmasiga yuklatilgan. Ushbu kompaniya yaqindagina XKSning tijoriy qismini qurish uchun NASAdan ruxsat olgan edi.

SEE-1 moduli dunyodagi birinchi kosmik turizm stansiyasi – “Axiom Station“ga birlashadi. Turizm stansiyasining 2028-yilda XKS dan ajralib chiqishi kutilmoqda.

• Kino
• Koinot
• San’at