Bugun dunyoning turli mamlakatlarida Xalqaro buxgalteriya va Xalqaro ilm-fan kuni nishonlanadi. Aynan mana shu kuni tarixdagi ilk motosikl ixtiro qilingan, mustaqil harakatlanuvchi birinchi lunoxod Oy yuzasida harakatlanishni boshlagan.

Xalqaro buxgalteriya kuni sifatida 10-noyabr sanasining tanlab olingani bejizga emas. 1494-yilning aynan mana shu kunida italiyalik matematik Luki Pacholining “Arifmetika, geometriya va proporsiyalar haqida batafsil” kitobi nashr qilingan. Mazkur kitobdagi boʻlimlardan biri buxgalteriya hisoblari hamda tamoyillariga bagʻishlangan edi. Shu sababli ham Pacholi zamonaviy buxgalteriyaning asoschilaridan biri hisoblanadi, kitob nashr qilingan sana esa bayram sifatida nishonlanadi.

10-noyabr sanasi Xalqaro ilm-fan kuni sifatida ham nishonlab kelinadi. Mazkur sanani bayram deb eʼlon qilish 1999-yilda Budapeshtda oʻtkazilgan Xalqaro ilm-fan konferensiyasi delegatlari tomonidan taklif qilingan.

1885-yili muhandislar Gotlib Daymler va Vilgelm Maybax toʻrt gʻildirakli yogʻoch velosipedga dvigatel oʻrnatishadi. Noodatiy konstruksiya Nekkar daryosi sohilida soatiga 12 kilometr tezlik bilan harakatlangan. Shu tariqa dunyodagi ilk motosikl ixtiro qilingan.

1970-yili sobiq ittifoq kosmosga “Luna-17” stansiyasini chiqaradi. U Oy yuzasiga qoʻnadi va aynan mana shu kuni tarixdagi mustaqil harakat qiluvchi birinchi apparat – “Lunoxod-1” Oyda harakatlana boshlaydi. Yerdan turib boshqarilgan apparat 11 oy davomida Oy yuzasida sayohatda boʻlgan.

1928-yilning 10-noyabr sanasida taniqli italyan bastakori Ennio Morrikone dunyoga kelgan. U filmlar uchun yozilgan saundtreklari muallifi sifatida uch marta “Oltin globus” mukofotini qoʻlga kiritgan, ikki marta “Oskar” mukofotiga munosib koʻrilgan, besh marta BAFTA mukofoti bilan taqdirlangan.

• Tarix
• qiziqarli