Lukashenko Ukrainadagi harbiy harakatlarda ishtirok etgani uchun xalqaro huquq doirasida javobgarlikka tortiladi. Bu haqda gap borgan G7 davlatlari yetakchilarining yig‘ilishi kecha, 8-may kuni bo‘lib o‘tdi.  

“Hech qanday holatda tinch aholi va jangovar harakatlarda faol ishtirok etmayotganlar qonuniy nishon bo‘la olmaydi. Biz prezident Putinni va bu tajovuzni keltirib chiqargan va ularning sheriklarini, jumladan, Belarusdagi Lukashenko rejimini o‘z harakatlari uchun xalqaro huquq doirasida javobgarlikka tortish uchun bor kuchimizni ayamaymiz. Shu maqsad yo‘lida butun dunyodagi ittifoqchilarimiz va hamkorlarimiz bilan birgalikda ishlaymiz”, – deyiladi “Katta yettilik” bayonotida.

Shuningdek, G7 rahbarlari bu borada javobgarlikni ta’minlash uchun barcha sa’y-harakatlarni hamda ushbu masala bo‘yicha olib borilayotgan tergov va dalillarni to‘plash, jumladan, Xalqaro jinoiy sud prokurori, BMTning Inson huquqlari bo‘yicha Kengashi topshirig‘iga binoan mustaqil tergov komissiyasi va YeXHT missiyasi tomonidan olib borilayotgan ishlarni qo‘llab-quvvatlashga kelishib olingan.

“Biz, shuningdek, Rossiyaning Ukrainada demokratik yo‘l bilan saylangan mahalliy hukumatni almashtirishga bo‘lgan urinishlarini qoralaymiz. Biz bu harakatlarni Ukraina suvereniteti va hududiy yaxlitligini buzish sifatida tan olmaymiz”, – deyiladi bayonotda.

Bundan tashqari, Qo‘shma Shtatlar Belarus Respublikasi va Rossiya Federatsiyasiga qarshi yangi sanksiyalarni e’lon qildi. Unga ko‘ra, ikki davlatning 2,6 ming nafar mansabdor shaxslari sanksiyalar ro‘yxatiga kiritiladi.

• Belarus
• G7
• Rossiya
• Ukraina
• Urush