Koloradolik geologlar Quyoshga eng yaqin joylashgan sayyora tarixini oʻrganib chiqib, unga oid qiziqarli maʼlumotlarni omma eʼtiboriga havola qildilar.

Olimlarning aytishlaricha, Merkuriy oʻzida katta miqdorda grafit koʻrinishidagi uglerodni saqlaydi. U taxminan milliard yil avval kuchli meteoritlar oqimiga toʻqnash kelgan. Sayyoraning yuza qismi kraterlar bilan qoplangan. Aynan mana shu maʼlumotlar olimlarga sayyora yuzasi olmoslar bilan qoplangan boʻlishi mumkinligi haqidagi taxminni ilgari surishga asos boʻldi.

Boshqa koʻplab yosh sayyoralar singari Merkuriy ham bir vaqtlar magma okeanlari bilan qoplangan boʻlgan. Erigan jinsning ustki qismiga esa grafit qatlami chiqib qolgan.

Mutaxassislarning fikriga koʻra, Merkuriydagi olmoslar koʻrinishi Yerdagi olmoslardan tubdan farq qiladi. Ular grafit, olmos va uglerodning boshqa shakllari qorishmasidan iborat “toshlar” koʻrinishida boʻlishi mumkin.

Merkuriy Quyosh tizimidagi boshqa sayyoralardan kichik oʻlchami bilan ajralib turadi. U tizimdagi ayrim yoʻldoshlar – Titan va Ganimeddan ham kichikroq. Merkuriydagi bir yil Yerdagi 88 sutkaga toʻgʻri keladi.

• Koinot
• qiziqarli
• tadqiqot