Xian Jiantong-Liverpul universiteti mutaxassislari tomonidan tadqiqot o‘tkazilganda, xitoylik olimlar noodatiy holatga duch kelishdi. Ayrim mikroblarni antiseptiklar o‘ldira olmas ekan va bu mikroorganizmlar antiseptiklarning tarkibiy qismi bilan oziqlanayotganini ma’lum qilishdi.

Biologlarning aytishicha, shaharlarda yashovchi mikroblar evolyutsiya jarayonini boshdan kechirmoqda. Shu yo‘l bilan ular insonlar mikroblarga qarshi qo‘llayotgan vositalarga qarshi kurashishga urinmoqda. Bugungi kunda ularni cheklangan resurslarga ega shahar sharoitlari ham qo‘rqita olmaydi.

Olimlar antiseptiklarga moslashgan bakteriya turlarini aniqladi.Tadqiqotchilar binolari ko‘p hududlarda mikroblar uchun ozuqa moddalari yetishmasligini eslatdi. Qolaversa, aholi har doim ularni yo‘q qiladigan vositalardan foydalanadi. Bu esa mikroblarni muhitga moslashishga majbur qilgan.

Olimlar Honkongdagi metro, turar joy binolari, jamoat muassasalari va inson terisidan 738 ta mikroorganizm namunalarini tekshirdi. Ularning deyarli yarmi fanga noma’lum bo‘lib chiqdi. Mutaxassislar ilgari olimlarga ma’lum bo‘lmagan 363 ta shtammni aniqladi. Bu kabi organizmlar insonlar terisida va atrof-muhitda yashaydi. Ularning ayrimlarida shaharlardagi sanoat mahsulotlarini parchalash uchun zarur genlar bor. Ular bu mahsulotlardan uglerod va energiya manbalari sifatida foydalanadi.

Noodatiy turlardan biri Candidatus phylum Eremiobacterota shtammi edi. Ilgari bu shtamm faqat Antarktidada topilgan. Mikroblar tozalash vositalarida mavjud bo‘lgan ammoniy ionlari yordamida oziqlanadi. Bundan tashqari, ular keng tarqalgan dezinfeksiyalovchi vositalar tarkibidagi spirtni parchalash qobiliyatiga ega.

Olimlarning ta’kidlashicha, bunday shtammlar sog‘liq uchun xavf tug‘dirishi mumkin.Shuningdek, tadqiqotchilar 11 ta Micrococcus luteus shtammlarini aniqladi. Bular immunitet tizimi zaiflashgan odamlarda o‘limga olib keluvchi infeksiyalarni keltirib chiqarishi mumkin.

Mutaxassislarning ta’kidlashicha, shifoxonalar bino ichidagi turli infeksiyalarni qo‘zg‘atuvchi patogenlar o‘chog‘i bo‘lishi xavfi bor. Ular, ayniqsa, reanimatsiya bo‘limlariga jiddiy xavf tug‘diradi.

• Foydali
• Lifestyle
• Tibbiyot
• Yangilik
• antiseptik
• bakteriya
• salomatlik
• tadqiqot