Prezident Shavkat Mirziyoyev Markaziy Osiyo va Ozarbayjon davlat rahbarlarining sakkizinchi Maslahat uchrashuvida energetika, suv resurslari, muhim minerallar va raqamli texnologiyalar sohasidagi hamkorlikni rivojlantirish bo‘yicha qator tashabbuslarni ilgari surdi.

Davlat rahbari kam uglerodli energetika salohiyati bo‘yicha qo‘shma konsepsiya ishlab chiqishni taklif qildi. Mazkur hujjat yangi ishlab chiqarish quvvatlarini barpo etish, energiyani saqlashning zamonaviy tizimlarini rivojlantirish va yangi energetika yo‘laklarini yaratishni muvofiqlashtirishga xizmat qilishi qayd etildi.

Suv resurslaridan oqilona foydalanish bo‘yicha Amaliy chora-tadbirlar o‘n yilligiga oid umumiy tashabbusni to‘liq amalga oshirish muhimligi ta’kidlandi. O‘zbekiston Orolni qutqarish xalqaro jamg‘armasidagi raislik davridan Jamg‘arma faoliyatini yanada samarali tashkil etish, yangi ekologik loyihalarni ishga tushirish va qo‘shimcha moliyaviy mablag‘larni jalb qilish uchun foydalanishni rejalashtirmoqda. Shuningdek, suv resurslaridan foydalanish masalalarida Afg‘oniston bilan doimiy va mazmunli muloqot olib borish zarurligi qayd etildi.

Mirziyoyev muhim minerallar bo‘yicha mintaqaviy alyans tashkil etish tashabbusi doirasidagi ishlarni faollashtirishni taklif qildi. Markaziy Osiyoning muhim minerallar zaxiralari yagona raqamli xaritasini yaratish bu yo‘nalishdagi dastlabki qadamlardan biri bo‘lishi mumkinligi bildirildi.

Shuningdek, mamlakatlar imkoniyatlarini birlashtirib, umumiy hisoblash infratuzilmasini yaratishni boshlash hamda talab yuqori bo‘lgan kasb va kompetensiyalarning mintaqaviy atlasini ishlab chiqish taklif etildi. Unda mutaxassislar tanqis bo‘lgan va yaqin yillarda talab oshishi kutilayotgan yo‘nalishlar bo‘yicha mamlakatlarning prognoz ma’lumotlarini birlashtirish ko‘zda tutiladi.

Prezident hamkorlikning asosiy maqsadini quyidagicha ifodaladi: “Taraqqiyot va xavfsizlik yo‘lida birdamlik va ishonch”. U kelgusi avlodlarga tinch, xavfsiz va iqtisodiy jihatdan kuchli mintaqani qoldirish zarurligini ta’kidladi.