Chaqaloqlarning tugʻilayotgan vaqtlarida yigʻlab dunyoga kelishlari ularning sogʻlom ekanligidan darak beradi. Ota-onalar bolalar yigʻisiga tez orada oʻrganib ham qolishadi. Agar diqqat bilan eʼtibor bersangiz, chaqaloqlar yigʻlagan vaqtlarida ularning koʻzlaridan yosh chiqmaydi.

Yosh tomchilari koʻzlarni himoya qilish va ularning tabiiy namligini saqlab turish uchun kerak. Biz kuchli his-tuygʻular, gʻam-alam, gʻazab, hattoki baxtli onlarni boshdan kechirganimizda koʻz yosh toʻkishimiz mumkin.

Mutaxassislarning aytishlaricha, koʻz yoshlarning toʻkilishiga koʻp hollarda vaqtinchalik stress sabab boʻladi. Hayotning murakkab davrlarida toʻkiladigan koʻz yoshlar organizmga yengillik hissini beradi.

Chaqaloqlarda esa koʻz yosh kanallari hayotning ilk davrida ishga tushib ulgurmagan boʻladi. Ular koʻzlarni namlantirib turish uchun yetadigan yoshni ishlab chiqaradi, ammo umumiy miqdor tomchilarni hosil qilish uchun yetarli boʻlmaydi. Chaqaloqlarda koʻz yoshlar 3-4 haftada, baʼzan esa 2 oygacha boʻlgan davrda hosil boʻlishni boshlaydi.

Chaqaloqlarning terisi ham haddan tashqari quruq boʻladi. Havo qanchalik issiq boʻlmasin, ular koʻz yosh toʻka olmaganlari kabi terlay olmaydilar. Sababi ter bezlari ham asta-sekinlik bilan ishla tushadi. Ilk haftada ter tomchilari chaqaloqlarning faqatgina peshona qismida paydo boʻlishi mumkin.

Bolalar terlay olmaganlari sababli isib ketgan vaqtlarida teri yuzasi qizarishni boshlaydi, nafas olishi tezlashadi, qoʻl va oyoqlar harakati susayadi. Bunday holatda xonani shamollatish, bolani qalin kiyimlardan xalos qilish tavsiya etiladi.

• qiziqarli
• salomatlik