Kasalligi haqida eshitgan odamlarning hammasi ham unga qarshi kurash boshlash uchun oʻzida kuch topa olmaydi. Bunday insonlarning aksariyati darhol tushkunlikka tushib qolishadi va barchasiga qoʻl siltab qoʻyishadi. Ammo, biz sizga keltirmoqchi boʻlgan roʻyxatdagi yulduzlar tushkunlik soʻzini oʻz lugʻatlaridan butunlay chiqarib tashlashgan va davosiz kasalliklarga chalingan boʻlsalar ham, kurashishdan mutlaqo charchashmaydi.

Bella Xadid

Dunyoning yetakchi supermodellaridan biri boʻlmish Bella Xadidga 2012 yilda laym kasalligi tashxisi qoʻyilgan. Ushbu infeksion kasallik odamga iksod kapalaridan yuqib qoladi. Ushbu kasallik irsiy yoʻl bilan avloddan avlodga oʻtmaydi, uning yaqinlarga yuqib qolishi ehtimoli ham yoʻq. Ammo, Xadidlar oilasida laym kasalligidan Bellaning onasi Iolanda va ukasi Anvar ham aziyat chekishadi. Ushbu kasallik surunkali charchoq, doimiy bosh ogʻriqlari, tana haroratining keskin koʻtarilishi, boʻgʻimlardagi ogʻriq bilan kechadi. Bella laym kasalligi bilan odatdagidek hayot kechirishi va karavotdan turib harakatga kirishishi uchun anchagina kuch sarflashga toʻgʻri kelishini bir necha bor takrorlagan.

Devid Bekxem

2009 yilda taniqli futbolchi astma kasalligiga chalingani koʻpchilikka maʼlum boʻldi. Sportchilar orasida astma kasalligi taqiqlangan mavzular roʻyxatida boʻlgan, sababi bunday tashxis sportchilarning karyerasiga bevosita salbiy taʼsir qilgan. Devid matchlar oʻrtasida zaxiradagi futbolchilar uchun moʻljallangan oʻrindiqqa joylashib ingalyatordan foydalangan. Maʼlum boʻlishicha, sportchi astma kasalligidan bolalikdan aziyat chekkan, ammo unga jamoatchilik eʼtiborini qaratishni xohlamagan. Shuning uchun ham uzoq yillar davomida kasal ekanligini yashirib yurgan.

Selena Gomes

Xonanda Selena Gomes 2014 yilda ijodiy faoliyatida tanaffus qilishga majbur boʻldi. Muxlislar bunga nima sabab boʻlganini taxmin qilishdan charchashdi, ana shunda Selena barchasini boricha soʻzlab berishga qaror qildi. Maʼlum boʻlishicha, xonanda teri silidan aziyat chekadi. Bundan tashqari, uning insultga chalinishiga bir baxya qolgan. Taniqli yulduzlar orasida ushbu kasallikdan Ledi Gaga ham aziyat chekadi.

Maykl Jey Foks

“Kelajakka qaytib” filmi yulduziga 29 yoshlik vaqtlarida Parkinson kasalligi tashxisi qoʻyilgan. Oʻsha vaqtlarda aktyorning karyerasi gullab-yashnayotgandi. Avvaliga uning kasallikdan aziyat chekayotganini atrofdagilar hatto payqashmagan ham, ammo oradan koʻp oʻtmay vaziyat yomonlasha boshlagan. Aktyor shundan soʻng bor haqiqatni hamkasblari va muxlislariga aytish qaroriga kelgan.

Kim Kardashyan

Bundan bir necha yil avval Kim Kardashyanning ham surunkali teri kasalligi – psoriazdan aziyat chekishi maʼlum boʻldi. “Men onamdan ushbu kasallikni meros qilib olgan oilamdagi yagona odamman. Birinchi marta psoriaz xuruji boʻlgan vaqtda 25 yoshda edim”, degandi Kim. Mashhurlar orasida Britni Spirs va Kara Delevin ham psoriazga chalingan.

• mashhurlar
• qiziqarli