Har yili oʻtkaziladigan “Oltin malina” antimukofotiga nomzodlar roʻyxati taqdim etildi. Unga “daʼvogarlik qilayotgan” filmlar orasida nominatsiyalar soni boʻyicha yetakchilik rejissyor Endryu Dominik tomonidan suratga olingan “Mallasoch” filmiga tegishli boʻlib turibdi.

“Mallasoch” filmi umumiy hisobda 8 ta nominatsiya boʻyicha antimukofotga nomzod sifatida koʻrsatilgan. Ushbu film Gollivud yulduzi Merilin Monroning hayoti va ijodi haqida suratga olingan boʻlib, undagi bosh rolni aktrisa Ana de Armas ijro etgan.

Musiqachilar Machine Gun Kelly va Mod Sun tomonidan ishlangan “Xayrli motam” komediyasi 7 ta nominatsiya boʻyicha “Oltin malina”ga munosib deya topilishi mumkin. Robert Zemekisning “Pinokkio” filmi esa 6 ta yoʻnalish boʻyicha antimukofotga nomzod sifatida koʻrsatilgan.

Maʼlumot uchun, “Oltin malina” antimukofoti har yili eng muvaffaqiyatsiz loyihalarga taqdim etib kelinadi. Bu yili antimukofotning taqdirlash marosimini oʻtkazish 11-mart sanasiga rejalashtirilgan.

• Kino
• Madaniyat
• Mukofot