Ekologiya va atrof-muhitni muhofaza qilish sohasidagi nazorat bo‘yicha inspeksiya boshlig‘i Adham Qurbonov ekologik nazorat inspeksiyasining 2022-yildagi faoliytai bilan bog‘liq raqamlarni ma’lum qildi.

Qayd etilishicha, ekologik nazorat inspeksiyasining 2022-yil davomidagi oʻtkazilgan 77 mingdan ortiq profilaktik tadbirlar davomida 45 300 ta qonunbuzilish holatlari aniqlanib, huquqbuzarlarga jami 40,0 mlrd. soʻm maʼmuriy jarima va tabiatga yetkazilgan zarar summalari hisoblandi.

1 409 ta holat boʻyicha 5,8 mlrd. soʻm jarima va tabiatga yetkazilgan zararlarni undirish va qonuniy chora koʻrish yuzasidan materiallar huquqni muhofaza qilish organlariga kiritildi. 36 ta holat boʻyicha jinoyat ishi ochilgan.

Huquqbuzarlardan 300 dan ortiq hayvonot dunyosi obyektlari, 6 442 kg dorivor, texnik va ozuqabop oʻsimliklar, 2 433 kg baliq mahsulotlari, 550 dan ziyod inventarlar belgilangan tartibda olib qoʻyilgan.

Olib qoʻyilgan hayvonlar tabiat bagʻriga qaytarilib, oʻtin va baliq mahsulotlari kam taʼminlangan oilalar va Mehribonlik uylariga topshirilgan.

Shuningdek, 446 ta xoʻjalik yurituvchi subyektlarda davlat ekologik nazorati tartibida tekshirishlar oʻtkazildi.

Tekshirishlar natijasida 379 ta qonunbuzilish holatlari aniqlanib, 437,8 mln. soʻm jarima summasi qoʻllanilgan. Atrof-muhitni ifloslantirganligi uchun 50,2 mlrd. soʻm qoʻshimcha kompensatsiya toʻlovlari hisoblangan.

Ekologik talablarga rioya etmagan 24 ta korxona faoliyati sud qarori bilan kamchiliklar bartaraf etilgunga qadar vaqtincha toʻxtatilgan.

Maʼlum qilinishicha, hududlarda noqonuniy tarzda daraxt va butalarni kesish, shuningdek, ularga shikast yetkazish bilan bogʻliq 4 673 ta huquqbuzarlik holatlari aniqlanib, 7 mlrd. soʻmdan ziyod jarima hamda 10 mlrd.soʻmdan ziyod tabiatga yetkazilgan zarar hisoblangan.

Bu koʻrsatkichlarning aksariyat qismi, asosan Qoraqalpogʻiston Respublikasi, Toshkent shahri, Buxoro, Qashqadaryo, Samarqand hamda Toshkent viloyatlari hisobiga toʻgʻri kelgan.

• Ekologiya
• Jarima